Salta!

Olga Osorio debuta na longametraxe adaptando a súa propia curta, Einstein-Rosen, nun filme familiar de ciencia ficción francamente entretido. O proxecto comezou a andar en Vaca Films co atraente título Un pasado por diante, pero, a última hora, decidiron cambialo polo insulso Salta! Un dos poucos erros que se lle poden achacar á peli. A cousa vai de dous irmáns, de 10 e 13 anos, que viven coa súa avoa nun barrio da Coruña de 1989. Desde a desaparición da súa nai nun buraco temporal, Óscar, o maior, vive obsesionado con descifrar o inxente traballo científico que deixou a súa nai para poder traela de volta. Teo, en cambio, vive máis ao día gozando da infancia a tope. As tornas cambian cando Teo descobre por casualidade un buraco de verme que o leva a 2022. Efectivo guión firmado a catro mans por Osorio e Araceli Gonda (Cuñados). Funciona, vai ao gran sen se enredar moito en teorías espazo temporais, e está ben equilibrado en canto a doses de comedia, drama, nostalxia, datos históricos, aventuras, amor e viaxes no tempo. Salta! acontece en tres épocas distintas. Ambientación, deseño de produción, efectos visuais, vestiario e perrucaría están nun altísimo nivel, meténdonos de cheo na historia e activando a necesaria suspensión da credulidade. Os efectos, se ben non son a para tirar foguetes, son xeitosos e axeitados. Resalta neste apartado a caracterización de Mabel Rivera (Mar adentro). Xunto coa súa xenial interpretación, até dubidamos se a maquillaxe lla fixeron para 1989 ou para 2022. No elenco destacan os nenos protagonistas, Rubén Fulgencio, como irmán maior, e Mario Santos, o pequeno que viaxa no tempo e come a cámara con patacas en cada escena. Tamar Novas (Corpo aberto), como irmán maior no futuro, e Marta Nieto (Tres), a guapa da que está namorado, sosteñen a "tensión amorosa non resolta". Completan o reparto, Manuel Manquiña (O home e o can), Machi Salgado (A illa das mentiras) e Cristina Iglesias (Eroski-Paraíso), nun breve pero decisivo papel que, ademais, levanta o filme nos últimos tramos. Malia estar rodada en castelán, Salta! contén varias secuencias en galego, e algo máis do que nos ten acostumados Vaca Films. Xa fose de motu propio, ou por "suxestión" de Olga Osorio, intúese un cambio de estratexia respecto á lingua nunha das maiores produtoras de cinema do país. Será que xa se van decatando de que rodar en galego non só non pecha mercados, senón que ademais aporta maior credibilidade ás personaxes e ás historias rodadas na nosa terra? Oxalá...