Ripley, a primeira grande heroína de acción

A primeira vez que vin Alien debía ter uns once ou doce anos. Daquela era un neno moi medorento que, noite si e noite tamén, tiña que mirar debaixo da cama por mor dunha serie de filmes que foron pululando pola miña retina desde moi temperá idade: A pantasma do paraíso, A invasión dos ladróns de corpos, Invasores de Marte, Dune, Gremlins ou Venres 13. O comercial que anunciaba Alien xa me producía arrepíos... O curioso foi que, tras vela, xa non tiven que mirar debaixo da cama nunca máis: unha muller vencía ao monstro! E que muller...! Alien: o oitavo pasaxeiro. Ridley Scott, 1979. 116 minutos Era a primeira vez que miraba tal cousa. Para a miña mente infantil ver que gañaba unha muller foi un shock, pero un shock positivo. Probabelmente foi o xerme para que comezase a ter un pensamento feminista e igualitario. E logo din que a ciencia ficción non serve para nada... Tamén Alien deu a pistolada de saída para a miña fase pre-púbere, máis que nada pola escena final de Ripley poñéndose o traxe de astronauta. Pero esa é outra historia... A tenente Ripley (Sigoruney Weaver) foi a primeira grande heroína de acción do cinema. E iso que na historia inicial de Dan O’Bannon e Ronald Shusset toda a tripulación do Nostromo era de xénero masculino. Foi durante o desenvolvemento do proxecto cando decidiron que as personaxes serían unisex, tanto poderían ser varóns como mulleres. Foi Scott quen decidiu que debía haber máis mulleres a bordo, e acertou de cheo facendo que Ripley fose muller. O xenomorfo non aparece até pasada unha hora de película. O seu aspecto fálico non é o único elemento sexualizado saído do macabro maxín de H.R. Giger (que levou un Óscar aos Mellores Efectos Visuais). A maneira de introducirse o alien no corpo de Kane, unha fecundación na gorxa ou o «parto» estaba premeditado, segundo O’Bannon, para representar unha «dramatización metafórica do medo masculino á penetración». Iso, unido a que as mulleres (Ripley e a alien) son as invencíbeis, remarcan o carácter feminista do filme. Ás veces os planetas alíñanse e Alien foi unha desas veces. Unha panda de entusiastas artistas de diferentes disciplinas coincidiron no mesmo espazo-tempo, uniron as súas forzas no momento perfecto das súas respectivas carreiras, e sacaron adiante esta obra única e irrepetíbel.