Ensinar a pensar

Filmes de mestres e mestras no cinema hai moitos, case se podería dicir que é un subxénero en si mesmo. Todas lembramos a Don Gregorio, o mestre laico e republicano d'A lingua das bolboretas, ou a máis recente O mestre que prometeu o mar, baseada na vida de Antoni Benaiges, mestre dos anos 30 que utilizaba o método recentemente "inventado" por Freinet, un método moi similar ao que xa empregaba o ortigueirés Xosé María Laxe unha década antes, e do que deberían facer unha película. Sergio Juárez é un mestre de primaria que recala na escola José Urbina López, en Matamoros, un dos lugares máis deprimidos e violentos de México. O colexio está considerado o peor de todo o país, pero o sistema de ensinanza de Sergio, baseado na motivación e na aprendizaxe libre, fixo crecer de maneira exponencial os resultados positivos e na excelencia de alumnas e alumnos. De feito, unha delas saíu de Primaria como a mellor preparada do país, incluso protagonizando a portada da revista Wired que dicía que era "a seguinte Steve Jobs". Radical está baseada nun artigo, de novembro de 2013 da mesma revista Wired, escrito por Joshua Davis e titulado: "Unha maneira radical de desatar unha xeración de xenios", que Zalla adapta nun guión equilibrado onde a comedia e o drama van da man. A estrela mexicana Eugenio Derbez logra unha das mellores interpretacións da súa careira póndose na pel do mestre que obrou o milagre. Un mestre inseguro, pero teimudo, que improvisa moito e que aplica un método non regrado baseado na motivación das inquietudes do alumnado e que comezou a aplicar despois de ver uns vídeos de internet, aferrándose a eles como o paradigma para provocar un cambio imposíbel de se lograr cos métodos tradicionais baseados na disciplina e a memorización. De primeiras, o método de Sergio choca co director e co plan escolar do centro, pero este decátase axiña de que este controvertido método funciona neses rapaces e rapazas, así que o deixa facer e acaban facéndose amigos. Pero a chegada dunha inspección fai perigar todo. Un filme para o gran público pero que non o trata coma se fose parvo. Trata de prescindir do romanticismo artificioso do educador milagreiro que os vai salvar a todos da miseria, que de seguro imporían en Hollywood, ao non esquecer a crúa realidade da violencia, miseria e morte do entorno, facendo así máis críbel a historia e máis humano un mestre que recoñece non ter todas as respostas e acaba convertendo esa aparente debilidade no verdadeiro éxito do seu método.