Contos da lúa vermella

As ondas do mar, un barco varado, un cabalo solto, un lamento. A desaparición do Rubio nun naufraxio afectou profundamente as habitantes da vila. Todas están petrificadas, quietas, cheas de pesar. Un feitizo semella mantelas a todas inmóbeis. Os seus pensamentos van descubrindo un misterio relacionado coa desaparición dun mariñeiro na mar. O Rubio chamábase. Lúa vermella / Lois Patiño / Galiza / 2020 / 84 minutos Tres bruxas chegan para desenfeitizar o pobo. Un dos puntos máis potentes radica nas impresionantes localizacións, principalmente en Camariñas e Lemos, recunchos de improbábel beleza que se converten de súpeto en pouco menos que obras de arte en estático movemento. E a mellor, e a máis agardada, resérvaa case para o final: a lúa. Unha lúa en todo o seu esplendor, captada no Observatorio Astronómico de Cotobade, deixándose guiar polos coñecementos na materia de Igor Piñeiro e Loli Lusquiños, da Asociación Sirio de Pontevedra. Malia prescindir de narrativa convencional, Lúa vermella contén todos os ingredientes dun filme de intriga de corte sobrenatural e fantástico. Bruxas, meigas, pantasmas, monstros mariños, morte... Iso si, manténdose fóra dos clixés que temos no imaxinario colectivo e con sinxelos, pero efectivos, efectos visuais. Diferentes voces en off, gravados de Urbano Lugrís (entre outros) e textos sobreimpresos, a modo de cinema mudo, van pautando as diferentes partes da trama; desde a presentación do misterio, pasando polas investigacións/conxuros das tres bruxas e ese xenial desenlace no que todo se tingue de vermello. Que ninguén se asuste por se perder en metáforas complicadas ou aburrirse con planos eternos, porque nin unha cousa nin a outra... O filme atrapa de principio a fin e a espectacular fotografía (tanto diúrna como nocturna), tamén de Lois Patiño, está repleta de contido. A través da súa particular poética narrativa, sustentada na realización, a imaxe e o son, Lúa vermella conecta cos padais máis exixentes, pero tamén consegue que os máis convencionais poidan gozar dun filme “diferente” ao alcance de todo o mundo. Tan só acaba de botar a andar e xa vén de vencer no Festival de Málaga na sección ZonaZine e de arrasar no Festival de Tolouse cunha Mención Especial do Xurado Novo e cos recoñecementos a Mellor Filme e Mellor Fotografía. Haberá máis...