Téxtiles de artistas na Fundación Barrié

Nun momento en que o téxtil está a gañar visibilidade no ámbito expositivo e na creación artística contemporánea, a Fundación Barrié trae ao noso país unha mostra de obras téxtiles deseñadas por algúns dos principais creadores do século XX, un proxecto concibido polo Fashion and Textile Museum de Londres que permite ver na Galiza 113 pezas entre teas e vestimentas, ben como material documental que as complementa. Téxtiles de artistas / Autores: Varios creadores / Lugar: Fundación Barrié. Cantón Grande, 9. A Coruña / Até o 19 de xuño de 2022 A exposición ofrece un percorrido pola historia da arte do século XX a través de tecidos deseñados por artistas de primeira liña, con exemplos senlleiros que se insiren nalgúns dos principais movementos artísticos: fauvismo, cubismo, surrealismo, abstracción e pop art. Entre os artistas temos nomes como Sonia Delaunay, Henri Matisse, Barbara Hepworth, Pablo Picasso, Raoul Dufy, Salvador Dalí, Henry Moore, Ben Nicholson, Joan Miró, Andy Warhol, Alexander Calder e Fernand Léger. Alén diso, a exposición que se pode contemplar na Coruña insire unha escolma especial de pezas de artistas e deseñadores do século XXI como Howard Hodgkin, Zandra Rhodes ou Damien Hirst. A mostra parte do contexto inglés cos traballos dos artistas do Omega Workshops de Bloomsbury: Duncan Grant, Raoul Dufy, Sonia Delaunay ou Ben Nicholson, que nunha tradición moi británica que xa viña do Arts & Crafts, un movemento estético xurdido en Inglaterra na segunda metade do século XIX que defendeu a artesanía creativa como alternativa á mecanización e á produción en masa e predicou o final da distinción entre o artesán e o artista. Nesta liña, o Omega Workshops de Bloomsbury pretendía romper as barreiras entre as belas artes e as artes aplicadas. O pintor fauvista Raoul Dufy foi o primeiro artista do século XX que comezou a se dedicar, con seriedade e suceso, á produción de deseños en tea, con traballos que supuxeron unha influencia e un estímulo para moitos outros colegas e empresas téxtiles. Tras a guerra, o movemento, co que se aspiraba a crear unha obra de arte en todos os lares, atinxiu a plenitude coa participación de destacados artistas contemporáneos: John Piper, Salvador Dalí, Ben Nicholson e Saul Steinberg. Ao final, estes tecidos artísticos foron transformados en prendas comerciais. Para rematarmos este sintético achegamento, quixeramos acabar cunha recomendación e unha lembranza: non estaría de máis recordar que na vangarda galega anterior á Guerra Civil temos artistas como Luís Huici, o xastre-pintor coruñés; Francisco Miguel ou Cándido Fernández Mazas que traballaron para levaren o seu labor ao ámbito téxtil, en especial os primeiros, que foron asasinados na Coruña en 1936 e que seguen case borrados da nosa historia cultural.