A colección Rac de arte contemporánea

A mostra Os brancos segredos do seu ventre é unha escolma de 53 de obras propiedade da colección da Fundación Rac de Pontevedra, unha das máis importantes do noso país dentro da arte contemporánea, e pódese ver na Cidade da Cultura até o vindeiro mes de setembro. O proxecto ten como alicerece unha atractiva e coidada proposta da comisaria Bea Espejo, que supera as dificultades espaciais do Museo Centro Gaiás cunha montaxe moi ben resolta. Para desintricar o embeleñado tecido de liñas que conflúen nos fondos da colección, a comisaria parte no seu discurso dun presente rigoroso que ilumina tamén a tradición da modernidade, eis a presenza de Antoni Tàpies, José Guerrero ou Joseph Beuys, aspecto que permite poder ler as obras inseridas nunha rica e activa contextualización. O conxunto de traballos e autores presenta nomes sobranceiros do panorama internacional como Imi Knoebel, Carmen Calvo, Cynthia Gutierrez, Eulalia Valldosera, Benjamín Torres, Ignasi Aballí, Tracey Moffatt, Julião Sarmento, John Baldessari, Tacita Dean, Pepe Espaliú, Roman Signer, Sofía Táboas, Iván Navarro ou Ernesto Neto. A respecto da presenza de galegos, é importante na colección de Carlos Rosón a incorporación de obras de Diego Santomé, Rosendo Cid, Marcos Covelo, Sara Coleman e Ángela de la Cruz. Os brancos segredos do seu ventre / Comisariado: Bea Espejo / Museo Centro Gaiás, Cidade da Cultura, Compostela / Até o 5 de setembro de 2021 Por medio das pezas destes creadores, o espectador pode percibir os elementos de continuidade da modernidade plástica e detectar constantes formais e temáticas provenientes da pintura e escultura das vangardas do século XX en diferentes soportes (lenzo, vídeo, fotografía, instalacións...) nun continuo diálogo do que se pode tirar a conclusión do peso na arte actual da variedade de técnicas que mostran a súa vitalidade ao hibridizárense nos diferentes soportes e transmitiren a súa estrutura profunda, a ligazón coa tradición da visualidade. Estes procesos tamén evidencian, certamente, as tensións da sociedade actual, as súas pulsións, e permiten percibir a situación da arte actual inserida nun contexto de tránsito, xa que nela se poden dexergar procedementos que a sitúan nun constante desprazamento, mesmo físico, cara a outros soportes e mundos visuais, un tránsito que tivo momentos fundamentais no contexto da vangarda histórica, en especial na obra de pintores como Malevich, que o levaron ao seu límite, ao situaren a arte nunha experiencia limiar e abisal ao tempo. O resultado ofrecido na mostra do Gaiás é un interesante mosaico de certos aspectos da arte actual que nos transporta a sensacións como cromatismo, fugacidade, ambigüidade, emocións intensas ou circunstancias vitais. Un proxecto, pois, inzado de atractivas suxestións.