XVII concentración de embarcacións tradicionais en Combarro

Esta sexta xa irán arribando as embarcacións ao porto desde as cinco da tarde, e mañá sábado terán lugar a regata a remos e a VII Regata da Pamplina, de embarcacións tradicionais a vela. O clube mariño A Reiboa, organizador da concentración, ten a súa orixe na asociación de veciños Boureante, que leva desde o ano 96 traballando na recuperación de barcos tradicionais e divulgando a cultura marítima, a través de exposicións, charlas, cursos de vela tradicional, ou, nos últimos anos, a participación no Día de Colón en Combarro ou na Feira Franca en Pontevedra.

Colaboran tamén o Concello de Poio e a Federación Galega pola Cultura Marítima e Fluvial, a entidade que organiza os Encontros de Embarcacións Tradicionais de Galicia bianualmente: pasaron xa por Ribeira (1993) Coruxo (1995), O Grove (1997), Rianxo (1999), Poio (2001), A Illa de Arousa (2003), Cambados (2005), Ferrol (2007), Muros (2009) e Carril (2011). O ano próximo, coa vila aínda por determinar, estes Encontros chegarán á súa XI edición.