Río Coura. De Caminha a Paredes de Coura

Orío Coura é un afluente do Miño, o derradeiro pola súa marxe esquerda, que drena territorio portugués nos concellos de Paredes de Coura, Vila Nova de Cerveira e Caminha. Nace na "Paisagem Protegida Serra de Corno de Bico" e despois de percorrer uns 50 km de curso revirado por terreo rochoso, ábrese na desembocadura nun amplo esteiro, ao pé da vila de Caminha, moi preto da chegada ao mar do río Miño. Paraxe: Río Coura / Concellos: Caminha, Vilanova de Cerveira, Paredes de Coura / Percorrido: 40 km / Dificultade: Baixa É un río ao que paga a pena achegarse porque é doado seguir o seu percorrido en coche, xa que a estrada que vai de Caminha a Paredes de Coura discorre polo seu val e a non moita distancia da súa canle, aínda que non hai moitos puntos onde sexa fácil achegarse á auga pola falta de espazos nos que deterse e a pendente do releve, mais atoparemos no traxecto varios puntos de interese nos que é obrigada unha parada. O primeiro témolo no comezo da ruta, en Caminha, para ver a súa desembocadura e a ampla marisma, as xunqueiras e as carriceiras, que ocupan unha superficie de máis de 250 hectáreas que, xunto co curso baixo, están protexidas como ZEC e ZEPA "Estuário dos ríos Minho e Coura" polo seu valor como punto de paso e invernada para especies de limícolas, anátidas, e paxaros e outras aves propias deses medios. O seguinte no punto onde remata o seu curso baixo, en Vilar de Mouros, onde podemos gozar dun amplo parque á súa beira, ver a ponte medieval, os pasos, a praia fluvial e ao seu carón a "azenha", o edificio do antigo muíño no que catro rodas verticais accionaban os mecanismos (na contorna hai outras de difícil acceso ás que hai desprazarse adrede). Seguimos camiño por unha estrada con moitas curvas até chegarmos á ponte de San João por debaixo da que pasa o rego de San João, un dos principais afluentes do Coura, cunhas fermosas pozas. Un pouco máis adiante, no km 15,5 aproximadamente, temos á esquerda da estrada uns carteis de información turística do Couço de Montefurado onde, facendo un percorrido de 1 quilómetro, podemos visitar unha obra da minaría romana -os restos dun encoro e un túnel polo que se desviaba a auga, de case 200 metros de lonxitude, que se pode percorrer, para o que é imprescindible dispoñer dunha fonte de luz. Un cuarto punto de interese está nos restos da central eléctrica de Covas e no seu encoro. Outro na área de lecer de Covas, con espazo acondicionado e zona de baño. Facemos outra parada en Pagade, con azenha e area de lecer. A penúltima en Rubiaes, para achegarnos á ponte medieval. E rematamos en Paredes de Coura na praia fluvial do Taboao. Nas praias fluviais de Vilar de Mouros e Paredes de Coura celébranse dous dos maiores festivais musicais do verán de Portugal.