De Raxó a Combarro (Poio)

Unha camiñada de interese paisaxístico e ambiental ao longo do tramo de litoral entre Raxó e Combarro, con tramos rochosos de pouca altura, de acceso imposíbel porque están totalmente cubertos por edificacións e os seus feches, e areais de accesos limitados pola mesma razón. Paraxe: Ría de Pontevedra / Concello: Poio / Percorrido: 8 km (lineal) / Dificultade: Baixa Saímos de Raxó, desde a praia da Pedra Alta, compartida con Sanxenxo, pasamos polas de Xiorto e Raxó, separadas polo peirao de Raxó, e subimos a costa para, por un camiño acondicionado, baixar á praia de Sinás. Achegámonos polas rochas á punta das Sinás para ver o seo das Sinás, sen acceso posíbel por outro lugar, e volvemos atrás, á praia, para subir á estrada. Camiñamos pola berma até chegar ao indicador de Praia de Fontemaior. Baixamos a ela e, para non volver á estrada e aproveitando a marea baixa, seguimos polas rochas dos recheos das propiedades que hai por enriba e de pequenos cantís bastante rillados, entre as que hai pequenos areais que cobre a marea e para os que non existe outro acceso posíbel, até que chegamos á praia do Laño, onde atopamos o primeiro acceso desde a estrada, por un carreiro ao pé do regueiro que desemboca nela, e un pouco máis adiante a entrada principal á praia. O areal do Laño está acondicionado e ten por enriba un camiño que pola punta de Samieira e logo con pasos elevados e tramos voados lévanos pola praia do Caeiro ao Covelo onde atopamos o peirao, as praias, e a desembocadura do rego do Covelo formando unha fermosa escorregadoira. No remate do seo do Covelo está a praia de Area da Barca e a punta da Cachola. Desde aquí, seguir pola costa non compensa o esforzo así que volvemos á praia e desde ela subimos á estrada até chegar ao indicador da praia da Ouriceira. Baixamos ao areal e temos que subir á estrada outro pouco até chegarmos ao indicador de Praia de Chancelas. Por un carreiro acondicionado baixamos a ela, percorrémola e superando unha punta rochosa pasamos á praia de Chancelas Pequena para ir á punta Vixía, o punto máis achegado á illa de Tambo, que forma parte do territorio do concello de Poio e estivo presente en todo o traxecto. Desde a punta Vixía hai que subir á estrada até chegar a Combarro. Un pouquiño antes de chegar ao desvío ao porto, entre unha casa e un hotel, hai unha baixada sen indicar á Area da Covicha, un pequeno areal que cubre a subida do mar. De volta arriba temos diante a praia da Canteira, o porto e o aparcadoiro onde rematamos o percorrido. Combarro é unha vila mariñeira que conserva un dos conxuntos arquitectónicos populares máis interesantes da Galiza e no que destacan as casas mariñeiras e os hórreos. Está declarado Ben de Interese Cultural, Conxunto Histórico e Sitio Histórico.