Queguas: Cortes da Carballeira, Casiña da Moura e Fecha do Fragón

Unhas camiñadas na serra de Queguas, unha pequena aliñación no concello de Entrimo, entre a serra do Laboreiro e os montes do Quinxo, que desde a fronteira con Portugal vai perdendo altura cara ao val do Limia, na contorna da localidade que lle dá nome e dentro do Parque Natural Baixa Limia-Serra do Xurés. Unhas andainas que nos achegan a paisaxes singulares do espazo natural galego-portugués, á diversidade da zona e a restos arqueolóxicos (dolmen Casiña da Moura) e etnográficos (cortes e cabanas de pastores). Paraxe: Baixa Limia / Concello: Entrimo / Percorrido: 15 km / Dificultade: Media Desde a Terrachá (Entrimo) imos a Queguas por una estrada que vai gañando altura pola aba da serra desde a que imos gozar de espectaculares vistas da contorna -do val do Limia, o encoro de Lindoso, e as Serras de Santa Eufemia e o Xurés -que podemos contemplar con repouso desde a área de lecer e miradoiro do Pedreiriño. Chegando a Queguas deixamos o vehículo no espazo que hai á entrada da localidade e botamos a andar para cruzala e seguir cara á serra por un camiño empedrado que nos leva ás Cortes da Carballeira onde tamén se atopa a ermida da Ascensión rodeada das antigas construcións nas que pasaban o verán os pastores. No adro da ermida atópase un magnífico exemplar de rebolo (Quercus pyrenaica) incluído no Catalogo de Árbores Senlleiras da Xunta de Galiza. Logo, desde a parte máis alta do lugar séguese un camiño á esquerda que vai aos cumes e no seu trazado pasa ao pé do dolmen da Casiña da Moura, despois alongamos a camiñada pola contorna, cara aos cumes e ás corgas do río Agro, e á volta, para non facela polo camiño da ida, na casiña da Moura imos á esquerda para volver dando un rodeo polos altos por un camiño e unha pista que nos devolven a Queguas, co que completamos un primeiro traxecto de entre 8 e 10 quilómetros. Mais sabendo da nosa debilidade polas fervenzas, e aproveitando que nunca nos atoparemos máis perto, fixemos un segundo percorrido, outros 5 km, para achegarnos aos saltos e as fervenzas da corga das Rozadas e a Fecha do Fragón -que se ve ao lonxe, desde a estrada, un pouco antes de chegar a Queguas- nuns regos que baixan da serra para ir ao río da Montaña. Para iso fomos pola rúa da parte baixa do lugar, logo por un camiño entre leiras que se fai case carreiro perto do río, polo que remontamos a corrente até chegar á confluencia coa Corga das Rozadas, onde cruzamos a pontella de pedra e deixamos o río da Montaña para remontar pola beira a corga na que deseguido se atopan un par de pequenas fervenzas; mais para achegarnos á Fecha do Fragón temos que seguir a remontar o río, agora polo mato e mellor pola parte alta do val, até onde poder baixar a uns penedos desde onde se ve a fervenza.