Parque natural Montes do Invernadeiro

No sur do Macizo Central, por debaixo de Cabeza de Manzaneda, no concello de Vilariño de Conso, atópase o Parque Natural do Invernadoiro. Un espazo que se estende 5.722 ha ao longo das cuncas dos ríos Ribeira Grande e Ribeira Pequena, adquirido pola Xunta no ano 1986, ao mercar unha finca privada dedicada á produción forestal, para a elaboración de pasta e papel, que arrasara un incendio uns anos antes. Na actualidade, gran parte do terreo está cuberto por mato de uces e xestas, entre as que medran capudres, bidueiros e acivros; manchas de piñeiros que se libraron do lume; bosques de ribeira ao pé das correntes de auga e, noutros lugares menos accesibles, espazos con moi bos exemplares de especies autóctonas, entre os que se atopan carballos e acivros centenario. Na área da Reserva Integral, á que só se pode acceder para realizar labores de conservación e con fins científicos -para o que se precisa dunha autorización especial- consérvanse os que, posiblemente, sexan os bosques máis antigos de Galicia con carballos de máis de 500 anos, acompañados de acivros, carbas, pradairos, bidueiros, capudres, salgueiros... Estas particularidades, sumadas á súa localización no Macizo Central ourensán, coas súas peculiaridades climáticas e xeolóxicas, afastada e lonxe de poboacións e vías de comunicación, fan do lugar un punto de grande interese natural (xeolóxico, paisaxístico, botánico e faunístico) e ecolóxico (é unha zona de transición onde se atopan comunidades vexetais atlánticas e mediterráneas) polo que está integrado ademais dentro da Zona Especial de Conservación (ZEC) do Macizo Central da rede Natura 2000. Calquera data é boa para facerlle unha visita e percorrer algunha das rutas sinalizadas, de distinta lonxitude e grao de dificultade, pero a primavera -cando esperta a natureza e estrea os verdes e as flores- ou o outono -cando as árbores ofrecen cada unha a súa cor, ou, ao perderen as follas, amosan o seu traxe de carrizos e brións- son datas especiais. Para poder visitalo temos que ter en conta que o acceso está limitado polo que é necesario solicitar previamente un permiso ao Servizo de Conservación da Natureza de Ourense, que se pode recibir por correo electrónico, para logo irmos a Campobecerros (Castrelo do Val) -onde podemos chegar desde Verín (uns 25 km), desde as Vendas da Barreira por Sanguñedo (uns 20 km) ou desde Laza (uns 15 km polo camiño de Santiago Seabrés)- de onde sae a pista pola que temos uns 10 km até as casas da Ribeira Pequena. O parque conta con paneis informativos das rutas e zonas valadas nas que viven en semilibertade cervos, gamos, cabras feras...