Padrón. De Santiaguiño do Monte a Iria Flavia

Padrón asenta na veiga do tramo final do curso do río Sar, pouco antes de este desembocar no Ulla; é unha vila de tradición e fonda raíz xacobea. Porto orixinal do mito, con varias historias relacionadas co Apóstolo e arranque da derradeira etapa do camiño portugués, mais non só. Tamén é un centro comercial da zona, no que se celebra feira todos os domingos, e un bo lugar para andar e ver, no que facendo un roteiro duns 6 km podemos achegarnos aos puntos de máis interese. Paraxe: O Sar / Concello: Padrón / Percorrido: 6 km / Dificultade: Baixa Comezamos no campo da feira e pola beira do río percorremos o paseo do Espolón, onde veremos os recordatorios de dous dos padroneses máis importantes (Rosalía de Castro e Camilo José Cela), até chegarmos á igrexa de Santiago onde se atopa o "Pedrón", a ara romana na que segundo a tradición amarrou a barca que trouxo ao apóstolo e da que tomou o nome a vila. Cruzamos a ponte de Santiago para achegarnos á fonte do Carme e deixándoa atrás e indo á esquerda subimos a costa e á escaleira que nos leva ao adro do convento do Carme, un miradoiro sobre a vila. A panorámica mellorará cando volvendo á fonte e deixándoa á dereita imos ás escaleiras polas que subimos a Santiaguiño do Monte (área de lecer, capela, miradoiro...). Baixamos polo camiño da subida e coa chegada á ponte xa rematan as dificultades de relevo, porque o resto do percorrido é completamente chan. Volvemos cruzar o río e atravesamos a vila para ir ao Xardín Botánico Artístico que acolle especies curiosas e algunhas protexidas no catálogo da Xunta de Galiza (palmeira do Senegal, secuoias,...). Desde el, pola rúa que vai á estación do tren, cruzamos a canle pola que se xebra parte do caudal do Sar, unha canle construída para evitar os alagamentos que as enchentes provocaban cada inverno na contorna. Despois de pasar a vía do tren imos á esquerda para ver e visitar a casa museo de Rosalía de Castro (hai que ter en conta os horarios). Desde aí volvemos atrás para cruzar as vías e, seguindo os indicadores, ir á dereita, a Iria, para coñecer a igrexa, o cemiterio da Adina e as súas antigas oliveiras, e, xusto de fronte da igrexa, o museo de Camilo José Cela, tamén visitábel. Desde aquí volvemos á vila para rematar o percorrido. Podemos facelo pola beirarrúa da estrada ou desviarnos polo camiño dos peregrinos, máis tranquilo, e deixarnos ir logo polas rúas do centro até onde comezamos. Nunha visita máis demorada podemos achegarnos a Herbón, máis coñecido pola sona dos seus pementos que pola súa igrexa románica, onde tamén podemos ver o convento e as sobreiras do seu adro, e, baixando ao río, as pesqueiras da lamprea; uns 8 km ida e volta pola estrada que vai a Carcacía e Pontevea.