De Nerga ao Cabo Home

U nha camiñada arredor do seo de Barra, -un espazo con dúas partes ben diferenciadas: unha baixa na que se acumulou a area que formou as praias e os seus sistemas dunares e outra rochosa, de maior altitude que, protexe a anterior-, nunha das zonas mais interesantes e fermosas do litoral de Cangas, incluída no LIC Costa da Vela. Unha área de enorme interese natural (polos ecosistemas dunares, rochosos e os fondos mariños, coas especies que acollen), xeolóxico (variedade de rochas, cantís, furnas, formacións dunares...) e paisaxístico (con vistas sobre a Ría de Vigo, as Illas Cíes e os cantís da Costa da Vela). Un percorrido que comezamos en Nerga, a onde chegamos seguindo a estrada de Cangas a Aldán, collendo nela desvío a Donón e logo a Nerga ata chegarmos ao aparcadoiro ao pé da praia. Antes de comezar podemos facer un pequeno desvío ata a punta Creixiña, a algún dos puntos que fan de miradoiros sobre o seo e as praias, para enfrontarnos logo aos 2 km dun areal case continuo que forman as praias de Nerga, onde podemos ver as embarcacións tradicionais varadas na área e o Con de Nerga até ir dar á punta Mexilloeira, un pequeno saínte rochoso no que remata a praia de Nerga e comeza a praia de Area Meán ou Viñó. Percorremos área Meán e cruzamos a punta Preguntoiro para entrarmos na praia de Barra pola que imos até a desembocadura do rego de Donón onde remata a area (no traxecto de ida ou de volta non podemos esquecer achegarnos ás zonas de dunas nin aos bosques de piñeiros que as cobren e fixan). Cruzamos o rego e camiñamos logo polo carreiro que vai pola beira da aba do monte de Melide e gañando altura para levarnos á pista de Punta Subrido, onde podemos ver o faro e gozar de panorámicas da ría de Vigo, do seo de Barra coas praias que acabamos de percorrer, e as illas Cíes. esde alí baixamos á praia de Melide, acollida entre as puntas Subrido e Robaleira, e seguimos logo ata a punta Robaleira e a Cabo Home. Na contorna de Cabo Home chama a atención o cambio de cor e de aspecto dos cantís. Cambio debido á presenza de rochas metamórficas (gneis) -que forman parte dun complexo que vai desde Malpica ata o Sur de Galiza-, unhas rochas de cor escura, que contrasta co gris claro dos granitos, e dispostas en estratos, con distintas orientacións, nas que aparecen fallas e dobras que dan lugar a formas erosivas características e á presenza, na proximidade do faro de Cabo Home, dunha furna con arco. O camiño de volta podemos facelo polo mesmo que o da ida, tomando algúns atallos ou cos desvíos complementarios para achegarnos a ver de preto, e con demora, detalles que deixaramos de lado á ida.