Litoral de Vigo (norte), de Teis a Bouzas

O litoral da parte norte do concello de Vigo, onde se asenta a cidade, é un litoral artificial, unha sucesión de ramplas, varadoiros e puntos de atraque creados para o desenvolvemento das actividades económicas: os servizos portuarios, o transporte marítimo, a industria e a pesca, a construción de barcos, o mantemento da frota e os seus servizos (e unha boa parte desa industria, maiormente a relacionada coa pesca e as actividades complementarias da mesma, atópanse necesariamente na beira do mar), o que o converte, como o da maioría das cidades portuarias, nun litoral illado e afastado por unha barreira de valados que impiden achegarse ao mar. Mais con todo, entre Teis e Bouzas, quedan algúns lugares, maiormente na contorna do monte da Guía, que conservan espazos sen transformar nos que se acollen abrigos para embarcacións menores e pequenos areais, que aproveitan para o lecer as persoas dos arredores. O primeiro atópase ao pé do límite do concello (que marca o rego Pisadoiro, que desauga á esquerda da praia de Arealonga de Chapela (Redondela), onde temos a punta de Arealonga, detrás dela un pequeno areal, o porto da Cacharela, a praia de Mende, e a punta na que se atopa a EDAR. Un tramo para gozar de vistas da ría e dous pequenos areais. O segundo, o máis completo e interesante, atópase na contorna do portiño de Teis e a praia de Ríos, e desde a praia de Ríos hai un roteiro, a "Senda azul litoral e monte da Guía", sinalizada polo concello, que nos leva, pola praia da ETEA e a praia e a punta de Areíño, até a praia e punta da Guía e o faro. Desde aquí podemos seguir, fóra da ruta, por un carreiro a media altura dos cantís que enlaza logo na escaleira que baixa á praia que hai en fronte do illote Cabrón e continúa despois polo bosque até saír á outra escaleira que baixa ao mar ao pé da praia da Lagoa, e aínda podemos alongar a camiñada até a praia da Manquiña, onde volven comezar os recheos e os valados que impiden seguir pola beira. A volta, para camiñar máis comodamente e para aforrar tempo, farémola polo roteiro sinalizado. Aínda que, aproveitando onde estamos, podemos desviarnos ao monte da Guía para gozar das panorámicas da ría e ter unha vista da cidade e das instalacións portuarias que ocupan a costa. Ida e volta teremos percorrido entre uns 4 e 5 quilómetros. O último espazo da contorna urbana con acceso ao mar son o crebaondas e os peiraos do club Náutico e o Porto deportivo, a Estación Marítima e o peirao de transatlánticos onde se atopa o Xardín dos Silos do Cable, no que unha exposición permanente ofrece información histórica sobre a actividade dos "cableiros" e a súa relación coa cidade.