Litoral de Fisterra, entre a calma da ría e a Costa da Morte

O concello de Fisterra ocupa un saínte de relevo irregular entre a ría de Corcubión (chamado tamén seo de Fisterra) e a Costa da Morte, onde os montes caen sobre o mar en grandes desniveis (O Facho, 241 m, O Veladoiro, con 234 m). A súa costa é moi diversa, con áreas abrigadas, no interior da ría e zonas expostas, no mar aberto, con grandes tramos ocupados por cantís, illotes e baixos, e algunhas praias con bos sistemas dunares onde dominan os ventos e a ondada. A costa exterior está protexida no LIC/ZEC "Costa da Morte". Paraxe: Costa da Morte e Seo de Fisterra / Concello: Fisterra / Percorrido: 36 km (lineal) máis camiñadas / Dificultade: Baixa É un concello de importantes valores naturais e culturais, rico en vestixios históricos e arqueolóxicos desde tempos prehistóricos e moi ligada ás tradicións relacionadas coas rutas xacobeas. Entrando polo corredor chegamos a Sardiñeiro, onde collemos o desvío á dereita pola estrada que vai por Sardiñeiro de Arriba a Padrís e Lires. Á saída de Padrís un desvío á esquerda lévanos á punta do norte da praia do Rostro. Volvendo da praia collemos o primeiro desvío á dereita e achegámonos á outra punta da praia ao pé da desembocadura do rego do Cacheiro e da punta do Rostro. De volta na estrada collemos á dereita para irmos a Denle, desviámonos á localidade e cruzámola para saír a outra estrada que nos achega á entrada da praia da Arnela. Seguindo por ela imos a Duio (San Vicenzo) e desde alí ao monte do Veladoiro enriba do cabo da Nave. De volta en Duio, imos á dereita por Ermedesuxo a Duio (San Martiño) e por alí a Fisterra, A Atalaia, ao pé do campo de fútbol, onde está un dos accesos á praia de Mar de Fóra, ou a Ínsua, onde se atopa o outro. En Ínsua collemos calquera desvío á esquerda que nos leve á estrada principal e nela á dereita para ir ao faro, onde podemos gozar das vistas das dúas caras da costa de Fisterra. Do faro volvemos pola mesma estrada até pasar a igrexa e despois collemos a primeira rúa á dereita que nos permita baixar para achegarnos á praia da Ribeira, ao castelo e ao porto. Percorremos o porto pola beira e logo imos á esquerda, para subir á estrada de saída da vila. Ao pouco de acabar as casas temos varios accesos á dereita para achegarnos á praia da Lagosteira. De volta na estrada imos á dereita até o miradoiro sobre a contorna de Fisterra e o seo. Un pouco antes e por debaixo do miradoiro atópase a escondida praia de Talón. Un quilómetro e medio adiante do miradoiro entramos en Sardiñeiro, onde podemos achegarnos ao portiño e á praia. Seguindo pola estrada chegamos á rotonda pola que comezamos o percorrido, e se seguimos cara a Corcubión, a uns 200 metros, alcanzaremos o comezo da praia de Estorde, lugar no que remata o concello de Fisterra.