A Guarda, un litoral entre o Miño e o Atlántico

O concello da Guarda está situado no extremo suroeste do país, cunha parte na costa cara ao mar aberto e outra no esteiro do río Miño. A costa atlántica é rectilínea, rochosa, exposta, con dous seos na parte central que acollen a localidade e os únicos areais costeiros da contorna. Nela apréciase unha ampla rasa de abrasión antigamente mergullada no mar e que emerxeu en épocas xeolóxicas recentes. A ribeira do Miño, entre a desembocadura e a Pasaxe, é unha costa baixa e protexida na que os areais perden extensión e amplitude cara ao interior. Paraxe: Costa da Guarda / Concello: A Guarda / Dificultade: Baixa / Percorrido: 12 quilómetros Toda a zona é unha importante área de pesca e marisqueo (percebes, lagosta, nécora, polbo...). Unha parte do territorio do concello, no esteiro do Miño, está protexida dentro do LIC/ZEC “Baixo Miño” e desde 2011 hai unha proposta de creación do LIC/ZEC “Costa de Oia”, actualmente pendente de aprobación. Para unha visita de tipo xeral podemos facer un percorrido en coche duns 12 km que se pode completar con algunha camiñada. Comezamos na zona de aparcadoiro da punta do Bazar; a segunda parada témola nas cetáreas a onde nos desviamos pola estrada, que fai parte do Camiño Portugués pola costa, que remata ao pé da cetárea Redonda -un lugar de interese etnográfico que conserva o feche en toda a contorna e algunhas das gaiolas nas que se mantiñan as lagostas-, igual que toda a fachada costeira, un lugar de interese paisaxístico na que destacan os xogos das rochas e a ondada do mar. Volvemos á estrada para parar de novo na zona de aparcadoiro, área de lecer e miradoiro da punta. Na mesma área de lecer collemos a estrada que baixa á localidade da Guarda pasando polas praias da Area Grande e Fedorento, e continuando pola rúa máis próxima á costa chegaremos ao porto, ao pé do edificio da Atalaia, museo do mar, e do dique de abrigo. Desde aquí, como a rúa non ten continuidade, temos que subir á estrada principal e coller nela outro desvío ao porto que nos achega ao peirao e permítenos seguir pola beira do mar. Logo vémonos obrigados a subir á estrada para continuar até a volta do Tegra e alí seguir o desvío ao Muíño e á praia para achegarnos á desembocadura do Miño. Desde o Muíño, collendo os cruces á dereita, podemos ir por unha estradiña interior ás praias da Lamiña e da Armona e continuar pola pista da beirada até O Codesal e A Pasaxe, onde rematamos. Para completar a viaxe, é importante realizar unha subida ao monte Tegra (accédese desde A Guarda) onde podemos gozar das vistas do esteiro do Miño, cara ao interior, do litoral da Guarda e da costa Portuguesa. Ademais podemos percorrer o castro e coñecer o museo arqueolóxico.