Foz, a ría. Da ponte do Masma á praia da Rapadoira

Unha camiñada para percorrer a beira oeste da ría de Foz, e coñecer o espazo incluído na rede Natura como LIC/ZEC "Ría de Foz-Masma" e na ZEPA "Ría de Foz", aproveitando unha gran parte do trazado da segunda etapa dos Camiños Naturais do Cantábrico e algún desvío que nos leve máis pola beira do mar. Os camiños naturais do Cantábrico son un roteiro litoral que na Galiza percorre, en sete etapas, 170 km, entre Ribadeo e Ladrido (Ortigueira). Paraxe: A Mariña central / Concello: Foz / Percorrido: 9 km (lineais) / Dificultade: Baixa Comezamos na ponte do Masma para ver a parte de máis a dentro da ría, unha zona de augas quedas, pouco fondas e de fondo lamacento consecuencia en gran medida do estrangulamento que lle produce o dique que crea a vía do tren; logo percorrendo o camiño acondicionado da beira da estrada imos ata o desvío á dereita, pola estradiña que, ao ir gañando altura, nos ofrece unha boa panorámica desta zona interior. Ao chegarmos ao final da recta, e da subida, temos un desvío á dereita que baixa para levarnos de novo á beira da auga na praia dos Fondás e a punta da Arnela. Se a marea está alta temos que volver polo camiño da ida, pero se está baixa podemos seguir pola praia e por debaixo do cantil da punta da Granda para chegar a un camiño que, beireando o pequeno esteiro do rego de Vilaronte, nos volve á ruta, co que aforramos a subida e medio quilómetro de camiñada. O camiño segue preto da auga e métenos no esteiro do río Centiño ata chegarmos ao pé dos pasos de Malates, que servían de atallo para cruzar a ría á xente da contorna, dos que só quedan unhas ringleiras de pedras no fondo do río. Nesta zona, debaixo do tendido eléctrico, temos que apartarnos do río para subirmos ata a beira das casas e continuar ata o novo desvío polo que logo cruzamos o río Centiño e imos á outra banda do esteiro, do que adiante hai unha boa vista, e pasar por debaixo do campo de fútbol. No empalme collemos á dereita, rodeando unha mancha de árbores, para volver á beira e atoparnos de novo co que queda dos pasos de Malates, como explica o panel que hai á beira do camiño, e seguindo atopamos outro panel que nos conta da draga "A Chata", da que, debaixo do cantil, temos o pouco que queda dos seus restos, un pouco máis alá chegamos ao asfalto para rodear os estaleiros, aínda que se a marea axuda podemos seguir pola beira, ata acadar a punta dos Malates e desembocar na zona portuaria. Desde aquí percorremos a fachada marítima da vila, pasando dun peirao ao outro, para mirar a estreita boca da ría, pouco máis dun cento de metros entre a punta Tupide e o dique do peirao, e desembocar na praia da Rapadoira, onde damos por finalizado o percorrido.