De Cangas a Nerga

Olitoral de Cangas (O Morrazo) é tan extenso e variado que permite facer infinidade de itinerarios nos que sempre hai praias e cantís e panorámicas sobre as rías ou o mar exterior. Nesta ocasión percorremos a beira da contorna urbana e afastámonos logo pola senda do litoral. Comezamos a camiñada na punta da Rodeira para irmos pola praia dos Alemáns e a da Cova da Lontra até ao límite do concello, a praia do Canabal. Alí damos a volta polo camiño de ida para percorrer, pola beira do mar, a praia da Rodeira, a fachada da vila e as instalacións portuarias do Salgueirón, até deixalas atrás para chegar á Congorza, onde remata o paseo. Na Congorza atopamos os restos da antiga factoría baleeira, o porto, as praias e a lagoa, antes de chegar á praia de Areamilla, onde comeza o percorrido da "Senda costeira de Areamilla a Liméns", un traxecto acondicionado, duns 2 km, que, ao pouco do comezo, nos reserva unha sorpresa, o túnel, un cento de metros as escuras guiados só pola luz que entra pola boca de diante e atendendo aos reflexos da auga para evitar meter os pés nela –a non ser que se vaia avisado e se dispoña dunha lanterna–.Logo todo é doado: cantís con vistas e puntos de descanso, pequenos seos e grandes laxes, a furna do Fornelo e o portiño de Santa Marta –coa súa estreita entrada protexida por dúas puntas rochosas e o recollido areal do seu fondo–, uns metros máis adiante, na praia de Santa Marta, remata a senda pero o percorrido continúa. Da praia de Santa Marta pasamos, pola Pinela Vella, á praia de Liméns, no final da praia de Liméns cruzamos o rego e, polas pedras, subimos a un carreiro que nos leva a unha pista, por ela chegamos a unha entrada dunha propiedade que permite o paso de peóns e baixamos á praia de Temperáns onde collemos un carreiro que pasa por enriba da praia das Moscas e a punta da Pedra dos Patos para chegar ao punto onde remata un camiño que baixa das casas, onde collemos outro carreiro que nos achega á piscifactoría e á praia dos Castros, pasamos por diante da piscifactoría e logo, para continuar todo o perto do mar que é posible, collemos o carreiro á esquerda do asfalto, ben marcado porque é moi transitado por peóns e ciclistas, que nos leva a un camiño que un pouco adiante ten un cruce á esquerda para ir á praia da Masa onde sae outro carreiro que nos deixa na praia do Con de Nerga, obxectivo e punto final do noso percorrido. Pódese seguir camiño polas praias de Area Meán e de Barra e desde a praia de Barra coller un carreiro para ir á punta Sobrido, a praia de Melide e ao cabo Home. O percorrido desde a praia do Canabal a Nerga é duns 12 km. A volta a Cangas, se se coñece ben o sitio, pódese facer nuns 5 km.