Cumes e miradoiros na contorna do Chan da Arquiña

Saímos desde Domaio, ou desde a autovía do Morrazo na saída a Domaio, en dirección a San Lourenzo, por unha estrada que nos leva á área de lecer do Chan da Arquiña e ao miradoiro do Faro de Domaio, mais como o noso obxectivo non é so chegar alí senón ver e coñecer algo a contorna, deixamos o coche nun dos aparcadoiros que hai no Chan da Arquiña e botamos a andar. Paraxe: O Morrazo / Concello: Moaña / Percorrido: Uns 7 quilómetros / Dificultade: Media-baixa Primeiro achegámonos ao dolmen que lle dá nome ao lugar, que se atopa no medio dunha plantación de castiñeiros e carballos americanos, que fan unha sombra que é un agasallo en días de calor, e logo saímos na busca do cume do Faro. Deixamos o recinto da área de lecer, polo paso canadiano, e comezamos a camiñar pola estrada. A uns 200 metros, onde fai unha curva á esquerda, hai un carreiro, con bastante pendente, que serve de atallo, polo que chegamos ao pé das antenas que coroan o cume e ao vértice xeodésico, que se atopa enriba dunha estrutura á que se pode subir, con precaución, e paga a pena. Desde alí arriba hai unhas incribles panorámicas de trescentos sesenta graos: cara ao leste, a ponte de Rande e detrás a sucesión de montes até a Dorsal Galega; cara ao sur, a ría de Vigo e a cidade, e mais alá os montes do Galiñeiro e a Groba, até Portugal; polo oeste, as Cíes, Moaña, Cangas, Ons, o seo de Aldán e Sálvora; e cara ao norte, a ría de Pontevedra, parte da ría e a illa da Arousa, e detrás delas os cumes do Barbanza. Baixamos logo ao miradoiro para gozar mellor das panorámicas cara ao sur, que desde este punto non están embazadas polas antenas, e volvemos ao cume para baixar polo atallo da subida para ir á area de lecer, pasar por ela, cruzar a estrada e seguir pola pista que sobe case de fronte para irmos a outros miradoiros. Ao pouco atopamos un desvío á dereita, cun indicador de miradoiros, polo que imos ao Candón Pequeno, desde o que se repiten as panorámicas cara ao norte, e logo ao Candón Grande, desde o que tamén se repiten as panorámicas de cara ao sur. De volta, seguimos a pista camiño do Coto do Home, no monte Xaxán, onde hai outro grupo de antenas e, polo leste delas, un espazo desde o que temos unha panorámica do Seo de San Simón, dos esteiros do Verdugo e o Alvedosa, e dos montes até a Dorsal. Desde aquí volvemos ao punto de partida. Podemos facelo polo mesmo camiño ou por unha pista menos transitada, que vai achegada a linde entre os concellos de Moaña e Vilaboa, e logo segue até perto dos miradoiros do Candón, onde collemos un desvío á dereita que nos leva á pista da ida, moi perto do remate da camiñada.