A costa de Xove a pé (I): de punta Corveiro a Portocelo

É un espazo dun grande interese xeolóxico, paisaxístico e ecolóxico, onde podemos atopar ecosistemas mariños areosos e rochosos, cantís, dunas e esteiros cunha gran diversidade de flora e fauna. Os illotes acollen importantes colonias de aves nidificantes, ás que hai que engadir un gran número de aves mariñas nas épocas de paso (carráns, mascatos, corvos mariños...). Paraxe: Mariña Occidental / Concello: Xove / Percorrido: 14 quilómetros / Dificultade: Media Os elementos que o constitúen, e as panorámicas das que podemos gozar desde distintos puntos, convérteno nun espazo idóneo para unha camiñada, aínda que por lonxitude se aconsella dividilo en dúas partes. Nós consideramos que un bo reparto sería facer unha primeira desde o límite de Cervo a Portocelo e outra desde Portocelo ao límite con Viveiro. A costa pódese percorrer seguindo o roteiro dos Camiños do Cantábrico, que transcorre por trazados non moi lonxe da beira, e facer, cando o consideremos, desvíos para achegarnos a lugares nos que deterse a gozar das vistas e dos detalles. Ten tramos de forte pendente e numerosos desvíos que o volven máis longo. Comezamos na praia de Lago, desde onde podemos achegarnos, se a marea está baixa, á de Paraños, que non ten acceso por terra por mor do peche da factoría da alumina-aluminio, e desde alí volver pola beira até o remate da praia de Lago. Logo seguimos pola pista de terra até onde esta se xunta á estrada, para desviarnos á dereita e ir á punta e á praia da Cova e despois á punta das Cruces, desde onde temos unha vista panorámica de Morás, a praia e o porto. De volta á estrada e seguindo por ela pasamos á beira da praia para continuar cara á punta de Morás, con altos cantís e amplas panorámicas, e moreas de elementos de construción dos diques do porto da factoría de alumina, para despois, polo Camiño do Cantábrico, ir gañando altura até o miradoiro da Atalaia, a uns 90 metros sobre o nivel do mar, e o alto do Cabalo. Desde alí baixamos para achegarnos ao pé da illa Ansarón e a súa contorna, onde comezamos unha nova subida que chega ao punto máis alto no coto da Vela. Baixando este, unha vez pasada a praia de Sucastro, deixamos o camiño para irmos á punta de Merixe. Dela camiñamos un pouco cara ao interior para volver ao Camiño Natural, desde onde imos vendo a enseada e a pequena ría de Portocelo, que rodeamos facendo un pequeno desvío para achegarnos ao porto.