A costa de Malpica de Bergantiños (II)

Partindo da vila de Malpica collemos o primeiro desvío que nos achegue ás praias de Area Grande e de Canido, desde onde temos unha fermosa vista do seo, das praias e de Malpica ao abrigo da Atalaia. Desde aí saímos á estrada que vai a Ponteceso onde, ao pouco, atopamos un indicador de dirección á praia de Seaia, que nos leva por dentro do lugar, pero é complicado dar co camiño correcto, polo que o mellor é seguir un pouco máis adiante, onde volvemos atopar outros indicadores á praia de Seaia e ao cabo de San Hadrián. Meténdonos por este, imos até o pé do IES e alí volvemos ter indicacións que nos levan sen perda á praia; volvendo polo mesmo camiño ata o IES, xa estamos collendo á dereita a estrada que nos leva á ermida e ao miradoiro do cabo de San Hadrián para ver o espazo percorrido, as illas Sisargas e a costa ata a punta Nariga e máis alá. Paraxe: Costa da Morte / Concello: Malpica / Percorrido: 46,5 km (en coche) / Dificultade: Baixa Volvemos polo camiño da ida á estrada que vai a Ponteceso e logo atopamos, á dereita, o indicador de praia de Beo, á que hai que baixar e volver de novo á estrada para poder cruzar o río e poder seguir por ela até o seguinte desvío á dereita con indicadores a Barizo e ás praias de Seiruga e Area Pequena, un pouco adiante desviámonos á dereita para ir ao esteiro, á praia de Seiruga e á praia de Area Pequena, todas ben indicadas. Da praia de Area Pequena, sen volver atrás, seguindo a estradiña asfaltada, saímos á estrada de Barizo e, collendo por ela á dereita, imos ao lugar do porto de Barizo e á punta das Garzas. Desde o lugar de Porto de Barizo podemos achegarnos camiñando ata a praia, pero tamén podemos facelo no coche se, volvendo pola estrada, collemos o desvío sinalizado ao faro de punta Nariga, a praia de Barizo e ao porto; a uns 700 metros temos un desvío á dereita ao porto e a praia, que 300 metros máis adiante, se bifurca para ir, á praia, á dereita, e ao porto, á esquerda. Volvendo ao punto de partida do desvío temos que coller á dereita para seguir camiño a Punta Nariga. Ao pé da capela de San Nicolás, collemos á dereita e logo outra vez á dereita para ir xa sen perda até o faro de Punta Nariga. De volta, ao pouco de deixar atrás a capela de San Nicolás, temos un desvío á dereita que nos leva a Mens e ao chegar outra estrada ao pé das primeiras casas collemos á esquerda e seguimos logo cara á dereita para saír á estrada principal atopámonos case de fronte coas Torres de Mens, ás que podemos achegarnos, e despois coller a estrada en dirección a Malpica onde rematamos o percorrido. Desde o porto de Malpica a Punta Nariga percorremos uns 35 km (lineal), para volver a Malpica (por Mens) facemos 11,5 km. A costa de Malpica de Bergantiños (I)