A costa de Malpica de Bergantiños (I)

O concello de Malpica de Bergantiños forma parte do tramo de litoral coñecido como Costa da Morte, unha sucesión de cantís abruptos entre os que se atopan algunhas praias e que inclúe as illas Sisargas. Unha costa que acolle importantes valores naturais, protexida no LIC/ZEC e ZEPA "Costa da Morte" e con varios lugares declarados de Interese Xeolóxico ("Praia de San Miro e muíños de Ceán", "Rasas Cuaternarias do Cabo Santo Hadrián" e "Cizallas nas praias de Esteiro e Seaia"). Paraxe: Costa da Morte / Concello: Malpica / Percorrido; 36 km (en coche) / Dificultade: Baixa Dada a dificultade de acceso a moitos lugares, a lonxitude do percorrido (duns 75 km en coche), a variedade da costa de Malpica e o seu interese, propomos a posibilidade de facelo en dúas xornadas (mellor fóra de época turística), tendo como referencia a vila. Para achegármonos a algúns sitios de interese hai que facelo a pé. Se queremos facer todo o percorrido camiñando é preciso tomalo con calma para gozar das impresionantes vistas, de cada recuncho, ou dos elementos culturais, sen esquecernos dun paseo pola vila e o porto. Desde Malpica saímos pola estrada de Carballo até chegar á primeira rotonda para saír a Buño e, rodeándoa case por completo, saímos cara a Cambre. Desde Cambre podemos ir por Aviño á praia das Torradas, ou ir á praia dos Riás e achegarnos desde ela á das Torradas, camiñamos un pouco e aforramos uns quilómetros de coche. Desde os Riás temos que volver a Cambre para ir a San Miro ou, ao pouco de deixar a praia, collemos a primeira pista á dereita, de terra, en bo estado, que nos leva á estrada que baixa a San Miro, case ao pé da praia. Desde San Miro volvemos a Cambre para ir ao Ceán, ou seguimos a pista de terra que sae do remate do asfalto, que tamén nos leva ao lugar. No Ceán collemos á dereita cara a Ardeleiro e, na metade do camiño, á pista de terra, boa, pola que nos achegaremos aos muíños da Ribeira. Vistos os muíños e a contorna volvemos á estrada, collemos á dereita e xa estamos en Ardeleiro, onde collemos á dereita para cruzar o lugar e logo outra vez á dereita. Da primeira curva da estrada sae unha pista de terra, boa, pola que podemos achegarnos á punta Percebeira -cantil espectacular e vistas dos muíños e de Malpica- e á punta do Boi. Volvemos á estrada e seguimos á dereita, un longo tramo recto, e no remate da recta volvemos ir á dereita para circular máis preto do mar e ver, desde arriba, o illote do Castelo e a punta Muxeiro antes de chegar á capela de San Antón e desde alí baixamos polas rúas da vila até o porto de Malpica para rematar a primeira parte da viaxe. O percorrido en coche son uns 20 km desde a praia dos Riás, 7 máis se nos achegamos á praia das Torradas por Aviño e 9 km chegar de Malpica a Cambre.