Costa de cervo

O litoral está formado por unha liña case recta de cantís graníticos e seos, só interrompida pola saída ao mar dos ríos Xunco (seo da Rueta) e Covo (ría de Lieiro) e o cabo de San Cibrao, que acollen as praias da contorna. Unha parte do litoral está protexida nos LIC/ZEC e ZEPA "Costa da Mariña Occidental". Percorrer a costa de Cervo pola beira non é doado pola falta de camiños e polo abandono dos poucos que existen, pero pódese seguir a tramos polos carreiros dos pescadores. Paraxe: A Mariña Occidental | Concello: Cervo | Dificultade: Media | Percorrido: 15 quilómetros (a pé, lineal), 13 quilómetros (en coche) Comezando no linde co concello de Burela, un carreiro que sae da ruta dos Camiños do Cantábrico (beirarrúa e berma ampla, excluída do tráfico até San Cibrao) e un desvío del que vai pola beira do mar permítennos chegar até o Puntal. Con esforzo aínda se pode seguir un pouco máis, pasando pola vía do tren para achegarse á Furada Vella. Nese punto non queda outra que subir á estrada. Ao chegar ao río Xunco podemos cruzar, imprudentemente, pola ponte do tren ou dar o rodeo pola da estrada, para ir á praia da Rueta. De alí en diante a cousa segue igual: carreiro comesto polos toxos que podemos seguir até a altura das Irmáns e volta á estrada por un camiño esquecido para seguir pola súa beira até o pé do peche da piscifactoría, onde atopamos outro camiño, logo carreiro e toxos, para ir ás puntas Somonte e Cagarrosa; volta atrás para pasar a enseada do Coído e ir até a punta de Susprados, e nova volta atrás para subir á pista que vai aos xeradores eólicos, baixar ao aparcadoiro do polígono industrial e del ir á estrada. Ao pouco de entrar nela temos, á dereita, un camiño polo que imos ao Portelo e, desde alí, rodeando a punta, xa entramos na zona urbana de San Cibrao e temos pasos axeitados para percorrer a contorna da vila e achegarnos ao faro. Continuamos pola beira do esteiro até a ponte medieval para seguir pola outra beira até onde o permiten as instalacións da factoría de alumina, pasando ao pé da salga, da praia da Areosa e da punta Besugueira até chegar á praia Limosa. Do outro lado da factoría queda un curto tramo de litoral que acolle a praia de Paraños, ao que só se pode acceder desde Lago (Xove) e coa marea baixa. En coche hai moi poucos sitios onde facer unha parada á beira do mar: a primeira podemos tomala na praia da Marosa, en Burela, e a segunda no desvío á praia da Rueta. As seguintes virían en San Cibrao, no faro, desde onde se ve case todo, e na propia vila, para observar os lugares de máis interese; e as últimas despois de cruzar o río, e seguindo os indicadores, ao pé do almacén de salga e na praia da Limosa.