Costa de Arteixo

O concello de Arteixo asenta na fachada atlántica, nun dos estremos da Costa da Morte. Nos seus dezanove quilómetros de litoral, desde a punta da Moa até o seo de Lourido, atópanse cantís de distintas alturas, esteiros, coídos e extensos areais. É unha costa dunha grande diversidade e dun grande valor ecolóxico, paisaxístico e xeolóxico, cunha importante actividade industrial e turística. Unha parte está protexida no LIC "Costa da Morte", e no Cerro, na Punta Langosteira, atópanse, nas rochas, unhas interesantes dobras que as fan merecentes de estar incluídas no catálogo de Lugares de Interese Xeolóxico do IGE. Paraxe: Costa da Morte / Concello: Arteixo / Percorrido: 34 km (lineal, en coche) + camiñadas / Dificultade: Baixa Para ter unha visión xeral do litoral facemos un percorrido en coche que hai que completar con camiñadas. Comezamos en Arteixo, desde onde pola estrada da Coruña, e desviándonos na Pastoriza, imos a Suevos e ao Portiño. Alí podemos ver, cara ao leste, as puntas da Moa (límite norte do concello) e do Regueiro, cos illotes das Gaiandas; a praia de Auga Doce ou do Matadoiro nas proximidades da fábrica coñecida como "A Cheirona"; logo, o porto e as praias de Suevos (Area do Porto e Area Grande, separadas polo Puntido) e podemos facer un pequeno percorrido pola Punta Langosteira, desde onde hai unhas fermosas vistas da costa e cantís de interese xeolóxico. De volta en Suevos dirixímonos, por Rañobre, ao extremo norte da praia de Sabón, fronte ao porto exterior e logo, rodeando a central térmica, á praia e punta de Alba, onde desemboca o río Bolaños. Continuamos pola estrada máis próxima á costa e pasamos a carón da punta das Aguieiras, o Pichón da Bogueira, co "Monumento ao Voyeur", Os Castelotes, a Pedra da Herba e as praias de Repibelo, A Salsa, A Ucha e Valcovo ou Area Grande, até saír á estrada que vai a Caión. A seguinte parada é na praia de Barrañán, que podemos contemplar, xunto coa de Combouzos desde a punta do Compás. Neste enorme areal podemos dar un bo paseo pola praia e coñecer un sistema dunar ben conservado con numerosas especies típicas deste tipo de ecosistemas. O último tramo da viaxe facémolo seguindo a costa pasando a carón da Punta Alta, a praia de Reiro, o porto da Bendición e o recollido porto e praia de Sorrizo. Desde o lugar de Sorrizo hai unha estradiña que nos achega a un punto desde o podemos ir a pé á Punta da Torre e, uns metros adiante, onde remata o asfalto, temos que camiñar uns 200 m para chegar á caída ao mar do rego de Alvite ou de Augacae, lindeiro con Caión (A Laracha). Para ter unha visión de conxunto da costa de Arteixo podemos completar a viaxe subindo a algún dos montes costeiros desde os que hai unha boas e amplas panorámicas, como o Monticaño ou o monte Barbeito.