Castelo de Vitres

Unha curta camiñada, mais cunha certa dificultade pola pendente do terreo, por unha aba do sur da Serra da Barbanza –a ringleira de montes que separan as rías da Arousa e de Muros e Noia–, que é, a maiores, un espazo dunha grande riqueza paisaxística e arqueolóxica, no concello de Boiro, para subir ao Castelo de Vitres, ou, dito con máis propiedade, ao cume no que, en tempos, estivo o Castelo de Vitres, unha das numerosas torres fortes que houbo ao longo e ao largo do país, do que só quedan unhas escasas pegadas nas pedras do cume, nas que os construtores fixeron labras para preparar o asento dos perpiaños, e partes do camiño que permitía achegarse a el. Pero tampouco é o interese histórico o que nos leva a subir até alí, senón a paisaxe: as fervenzas polas que se descolga o río Lérez, aínda que no verán levan moi pouquiña auga, o botarlle unha ollada ao planalto da serra no que pace o gando ceibe, e, sobre todo, as impresionantes panorámicas da ría da Arousa que se abrangue en case toda a súa extensión. Paraxe: Serra da Barbanza / Concello: Boiro / Percorrido: 4 km / Dificultade: Baixa Temos, debaixo e á esquerda, Boiro e o cabo da Cruz, e mais á esquerda Rianxo, a illa de Cortegada e Vilagarcía, á dereita a Pobra e a boca da ría, no centro, a illa da Arousa, máis alá a illa da Toxa, o seo do Umia e a península do Grove, e, ao fondo, o Morrazo e as illas de Ons e Cíes, sen pasar por alto a presenza da incontable "flota" de bateas que fan da ría, e de Galiza, a maior produtora de mexillón de Europa. Un traxecto de pouco máis de 1,5 quilómetros, para salvar os 230 metros de desnivel que hai desde o lugar das Escobias, ou desde O Mosquete, ao cume, que se fai por un camiño, con partes empedradas, aínda que nalgúns puntos non é máis que un carreiro, que sen perda nos pon ao pé do obxectivo, ao que se chega logo por un desvío duns 300 metros por carreiros do gando. A volta pódese facer polo mesmo camiño, ou converter o traxecto nunha andaina circular baixando pola esquerda do cume (mirando á ría) até un grupo de árbores, que se atopa un pouco por debaixo, desde onde sae un carreiro que nos leva á estrada pola que, collendo logo cara á dereita, temos que percorrer uns 600 metros para volver ao lugar de inicio ou collendo, un pouco antes de chegar á estrada, un desvío á dereita que vai paralelo a ela e tamén nos devolve ao punto de inicio. Para chegar ao punto onde se comeza a camiñada podemos ir desde Boiro, por Runs, ao Mosquete, até onde hai uns 5 quilómetros, ou desde Escarabote, desde onde temos que percorrer 3 quilómetros para acadar o arranque dunha pista que hai entre as Escobias e O Mosquete que é o lugar máis axeitado para iniciar a ruta xa que conta ademais con espazo para deixar o coche.