Canón do Navea

O outono é a mellor época para camiñar polos vales dos ríos e polas fragas e gozar dos matices de cor con que nos agasallan as follas das árbores caducifolias, ou dos cogomelos, liques e brións que se atopan polo chan ou cubrindo rochas e toros de árbores. Paraxe: Terra de Trives / Concello; San Xoán de Río e Pobra de Trives / Percorrido: 35 km / Dificultade: Baixa Unha boa proposta pode ser achegarse ao val do Navea, unha ruta de grande interese paisaxístico, ecolóxico e xeolóxico para gozar de impresionantes paisaxes de paredes verticais e de frondosas fragas cunha gran biodiversidade. O "Val do Navea" foi declarado como Paisaxe Protexida pola Xunta da Galiza. Abrangue unha superficie de 691 ha nos concellos de San Xoán de Río e A Pobra de Trives, desde Ponte Navea até a altura do lugar de Navea, un pouco antes do encoro da Ponte Nova. O espazo ten, ademais dos seus valores propios, unha enorme importancia por ser un corredor biolóxico entre o Macizo Central e o sistema fluvial Miño-Sil. O río Navea (nun comezo chamado Queixa) recolle as augas de varios regos que nacen na Serra de Queixa, Montes do Samión e serra de San Mamede, que conflúen no encoro de Chandrexa de Queixa, e xúntase co Bibei nas proximidades da súa desembocadura no Sil. Unha gran parte do seu curso discorre por profundos canóns e vales encaixados de lousas, xistos e cuarcitas, orixinados pola acción erosiva das augas e os episodios fríos do Cuaternario, que conforman un ecosistema singular nos que a altitude e a pendente fan que as ladeiras aparezan cubertas por matogueiras e amplas áreas de bosques autóctonos, de grande interese ecolóxico e paisaxístico, que se corresponden con diversos tipos de hábitats de interese comunitario, nos que medran rebolos (Quercus pyrenaica), carballos (Quercus robur) e castiñeiros (Castanea sativa), con bidueiros (Betula alba), abeleiras (Corylus abellanea), ameneiros (Alnus glutinosa), pradairos (Acer pseudoplatanus), salgueiros (Salix spp.), cerdeiras bravas (Prunus avium)... e unha importante superficie ocupada por soutos. Para facer a ruta podemos comezar en San Xoán de Río, en Barrio ou na Pobra de Trives. Unha gran parte do percorrido discorre por estradas moi estreitas e cheas de curvas, pero con pouco tráfico. No camiño pódense facer numerosas paradas para gozar da paisaxe dos canóns do Navea e do Bibei, das fragas, e dos rochedos das abas do Cerengo. Con pequenos desvíos podemos visitar Ponte Navea, de orixe romana, ou Pena Folenche, un curioso lugar arredor do que hai varias lendas, desde o que temos una boas panorámicas das fragas de San Xoán de Río, facer pequenas camiñadas polos bosques das abas do canón do Navea ou completalo cun percorrido polo souto e a fraga en San Xoán de Río.