Camiñando polo litoral de Miño

O concello de Miño ten un territorio de relevo moi variado e irregular cun tramo litoral na marxe dereita da ría de Betanzos. A súa área costeira, duns sete quilómetros de lonxitude, abrangue o espazo comprendido entre as desembocaduras do río Lambre, na Ponte do Porco, e un pouco máis alá da do rego dos Muíños, que divide en dúas (Andaío e San Pedro) a praia de Perbes está formada por cantís, que reciben as ondas do mar aberto pola ampla boca da ría de Betanzos, e praias que se acollen nos seos que se forman entre as puntas. O elemento máis destacado é a praia Grande e a súa frecha na que se amorea a area coa que o mar quere pechar a saída do río Baxoi -o principal curso fluvial do concello- e a forza coa que a corrente do río se abre paso. Paraxe: Ría de Betanzos / Concello: Miño / Percorrido: 10 km / Dificultade: Baixa O litoral de Miño acolle importantes valores naturais, o tramo entre a desembocadura do Lambre e a praia da Ribeira, unha área de cantís co fondo areoso na que quedan ao descuberto amplos areais ao devalar a marea, está protexida no LIC "Betanzos-Mandeo" e o esteiro do Baxoi está proposto como LIC/ZEC, mais pendente de aprobación. Para facer un percorrido pola beira hai que aproveitar a marea baixa para poder camiñar por debaixo dos cantís porque por arriba impídeo o abrupto do terreo e a proximidade da vía do tren. Comezamos na Ponte do Porco achegándonos á beira do río Lambre e, acompañando o seu curso, entramos na parte de fóra do seu esteiro, no areal coñecido como praia da Alameda, á que hai varios accesos acondicionados, e continuando pola beira ímonos achegando aos cantís para dobrar a punta do Gafo. De aquí en diante a costa é elevada de paredes rochosas cortadas a pico, por enriba das que circula o tren, mais o areal segue ao seu pé até a punta de Sumiño, onde viramos para entrar na praia da Ribeira ou praia pequena de Miño, e desde ela, por unha pasarela elevada, chegamos ao porto. Desde aquí non é posible seguir pola beira polo que á saída do porto collemos o primeiro desvío á esquerda para pasar ao outro lado da punta Satareixas e baixar á praia Grande para percorrer os case 2 quilómetros, incluída a volta á frecha, que hai desde o seu comezo ata volver á estrada ao pé da ponte que cruza o río Baxoi. Desde aquí ata o final do percorrido hai que seguir pola beira da estrada e facer desvíos –os cantís e a privatización do litoral non deixan outra posibilidade-; o primeiro desvío é a 1,2 quilómetros para baixar á praia de Lago por un carreiro e unha longa escaleira -un pouco máis de 1 quilómetro ir e volver- e o segundo, 1,3 quilómetros máis adiante, para baixar á praia de Marín; desde ela, polas rochas, podemos pasar á praia de San Pedro ou de Perbes onde rematamos o percorrido.