Burela, unha xoia no Cantábrico

O concello de Burela (creado en 1994) está situado na Mariña luguesa, entre o final da Rasa Cantábrica e as últimas estribacións da serra dos Cabaleiros. É un concello pequeno en superficie, pero grande en valores naturais, económicos e culturais. Paraxe: A Mariña Central / Concello: Burela / Percorrido: 6,5 km + camiñadas / Dificultade: Baixa A actividade máis destacada é a pesca e a comercialización dos seus produtos, cun importante porto onde conviven embarcacións de pesca de altura coas de pesca artesanal, e unha importante lonxa onde se venden ata cento once especies diferentes de peixes e mariscos, entre as que destacan a pescada do pincho e o bonito e, en menor medida, a xarda, o xurelo, a sardiña, o polbo... A lonxa comercializa unha media de 24.500 toneladas ao ano. Hai varias razóns para visitar Burela: coñecer a vida dun importante porto pesqueiro e gozar da súa rica gastronomía, contemplar paisaxes que combinan cantís agrestes -nos que abondan as formas curiosas (furnas, illotes, pregues...)- con praias acolledoras, ou achegarnos ás mostras da súa historia e arte -visitando o "Reina del Carmen", un antigo barco boniteiro convertido en museo etnográfico da Cultura Mariñeira, e o Museo de Arte ao Aire Libre do espigón, conformado por obras do Concurso Internacional de Pinturas Murais Amarte que se celebra desde o 2017 coincidindo coa Feira do Bonito. A singularidade da costa de Burela, de xeito especial a súa xeoloxía, fai que estea catalogada como Xeosite (Lugar Xeolóxico de Interese Internacional), formando parte da "Zona de Cizalla Basal Ddo Manto De Mondoñedo", e LIX (Lugar de Interese Xeolóxico do Estado). Para achegarnos a coñecer Burela, propoñemos un traxecto en coche, con paradas, e curtas camiñadas, a non ser na contorna da praia do Cantiño, onde comezamos o percorrido e temos o tramo de costa máis recortada e irregular. Aquí, facendo aproximadamente 1 km a pé, podemos achegarnos a todos os lugares de máis interese: praia e punta do Cantiño, Pasada da Ronca, Punta e Río de Ancares, Portiño e Castelo das Pombas, e ver desde alí a Pena Doncela, O Bolar e a Igrexa de Coeda. A segunda parada farémola no porto ao pé dos pregues, a onde chegamos polo desvío ao porto e collendo na rotonda do final á dereita para circular ao pé do cantil. A seguinte, continuando pola beira do mar, nas praias do Pedrouro e O Portelo, e logo seguindo os sinais que levan á praia da Marosa imos circulando case á beira do mar e a estrada ten zonas de estacionamento preto de todos os lugares de interese (o cabo Burela, a praia do Ril, a punta da Laxe e a praia da Marosa). Como remate, podemos achegarnos ao monte Castelo, miradoiro e área de lecer, para gozar dunha panorámica xeral da vila e do concello.