A costa de Poio

Poio é un concello dun grande interese natural, artístico e etnográfico situado na marxe dereita da ría de Pontevedra. Unha viaxe de interese paisaxístico e ambiental ao longo dun litoral con dúas partes ben diferenciadas: o tramo entre Raxó e Combarro ata A Seca, en Poio, con tramos rochosos de pouca altura, de acceso imposible porque están totalmente cubertos por edificacións e os seus peches, e areais de accesos limitados pola mesma razón; e o tramo entre A Seca e a Ponte da Barca con escasa presión humana, máis natural, con grandes superficies areosas que son bancos marisqueiros, os lameiros do fondo da ría nos que se poden atopar numerosas limícolas e outras aves acuáticas e fermosos lugares para un paseo. Paraxe: Ría de Pontevedra / Concello: Poio / Percorrido: 18,5 quilómetros (lineal) / Dificultade: Baixa Propoñemos un achegamento aos puntos da costa máis interesantes e de doado acceso con vehículos. Ademais, hai numerosas opcións de realizar rutas a pé e varios lugares acondicionados como miradoiros a carón da estrada. Comezamos no porto de Raxó, poboación que linda con Sanxenxo, onde poderemos coñecer as praias da Pedra Alta, Xiorto, Raxó e As Sinás. Continuamos pola estrada cara a Poio e Pontevedra e ao pouco podemos parar para achegarnos a pé á praia de Fontemaior. Máis adiante atopamos o acceso á praia do Laño, de onde parte un paseo acondicionado que pola punta de Samieira lévanos ao Covelo onde atopamos o peirao e varias praias. De novo na estrada seguimos ata o desvío ás praias de Chancelas Pequena e á punta Vixía, o punto máis achegado á illa de Tambo, que forma parte do territorio do concello de Poio e estivo presente en todo o traxecto. A seguinte parada é Combarro, onde temos as praias da Canteira e do Padrón, os peiraos da Canteira e da Chousa e un fermoso conxunto de interese histórico-artístico e etnográfico no que destacan as casas mariñeiras e os hórreos na beira do mar. Despois dunha visita detida a Combarro seguimos viaxe desviándonos á Seca, onde temos vistas da enseada de Campelo, as desembocaduras dos regos Pereiro, do Mouro e das Cancelas e unha ampla área de lecer desde onde parte unha ruta a pé polo litoral que remata en Lourido. Para seguir en coche hai que volver á estrada principal e ao pouco coller un desvío que nos leva primeiro a Campelo, onde podemos ver a praia e o porto, e logo a Lourido onde poderemos visitar as praias da Cabeceira e do Polvorín ou Lourido, de novo fronte á illa de Tambo. Nesta zona pódese facer un bo paseo pola seca na marea baixa. Seguimos de novo cara á estrada e podemos achegarnos para rematar a viaxe no porto da Barca, compartido co concello de Pontevedra e desde o que podemos ter unha boas vistas do último tramo da costa de Poio.