A costa de Nigrán

O concello de Nigrán está situado no sur da ría de Vigo. O seu litoral é un espazo formado por dous amplos seos, que acollen no seu fondo extensos areais, os promontorios que os limitan, e a beira norte do esteiro do río Miñor; en conxunto unha zona case chan a non ser nos perímetros de Monteferro, onde hai cantís de máis de 50 m, e do monte Lourido. Percorrelo é doado pola súa propia natureza e porque conta con algúns tramos acondicionados que o facilitan. Na camiñada pasaremos por dous espazos naturais de interese, protexidos como LICs/ZECs na Rede Natura 2000, o “Esteiro da Ramallosa” e “Monteferro e illas Estelas”. O percorrido a pé, lineal, é duns 14 km. Facelo coa marea baixa fai máis doado moverse ou achegarse a algúns puntos. Comezamos a camiñar ao pé da praia do Portiño e desde alí imos a Prado para percorrer a beira do primeiro seo, o que hai de Prado a Monteferro, andando as praias das Canas e de Patos, 1,5 km. No remate deixamos a area para darlle a volta a Monteferro, subimos á estrada e collemos o primeiro desvío á dereita para, ao pouco, meternos en camiños entre as árbores, procurando ir sempre polos de máis á beira, por onde imos gañando altura, ao tempo que mantemos preto o mar, até desembocar no camiño e nos cantís ao pé do faro desde o que temos panorámicas da contorna, entre as illas Cíes e Baiona, coas illas Estelas no medio. No percorrido arredor do monte pasaremos polas Penisas Pequenas (unhas laxes con gravados rupestres e muíños naviculares). Ao completar a volta non podemos seguir pola beira, o relevo e os peches das propiedades impídeno, mais logo hai carreiros para desviarse ás praias desde onde, polas praias de Area Fofa e A Madorra, entramos no seo de Panxón. Da praia da Madorra pasamos polo istmo da punta do Castro, na que se asenta o porto de Panxón, e aquí, se temos tempo, podemos desviarnos para ver o Templo Votivo do Mar, unha fermosa e orixinal construción deseñada polo arquitecto Antonio Palacios. De volta na beira do mar temos por diante os case 3 km de areal que conforman as praias de Panxón e Area Loura, ou praia América, ás que só separa o río dos Muíños. No remate do areal atópase o monte Lourido que podemos rodear polas beirarrúas dunha estradiña perimetral para ver a Pedra da Garza, o seo de Baiona, a praia Ladeira, na cara de fóra da frecha do río Miñor, e, ao dobrar a punta da boca do río, o esteiro da Ramallosa, que logo seguiremos pola beira até rematar o traxecto na vella ponte do século XIII. A ponte da Ramallosa, sobre o río Miñor, é unha das pontes nas que en Galiza se facía o rito dos bautizos prenatais.