O Arousa reclamará nos despachos o pase na Copa

O Arousa foi eliminado na primeira fase da Copa do Rei após perder na Lomba ante todo un Primeira División como é o Granada por un resultado de 0 a 3. Non obstante, apostando polo porteiro do filial e 24 anos de idade Adri López como titular, o conxunto andaluz violou unha normativa da Real Federación Española de Fútbol (RFEF), organizadora da competición, que no seu artigo 250 indica que os xogadores con ficha dos filiais deben contar con menos de 23 anos para poder xogar. Ante este escenario, a escuadra galega confirmou que os seus servizos xurídicos xa están "traballando" para denunciar a situación ante a RFEF e obter así un boleto para a segunda rolda copeira.