O deber da memoria

Memoria é lembranza, síntese dun estudo, crónica, saúdos enviados aos ausentes, acción ou obxecto en honra de quen o merece. Lembramos quen defenderon a legalidade republicana contra os golpistas. Porén, o arqueólogo Xurxo Ayán fala de memoria ausente para a actividade guerrilleira en Galicia, concretándoo en Repil, Pobra do Brollón, a carón da parroquia da que é orixinaria a súa familia. Pois, como argumentan os estudos da guerrilla, se a guerra regular finalizou en abril de 1939, nos anos seguintes tivo lugar unha guerra irregular, non recoñecida, da que a memoria foi esmagada baixo unha lousa de falsidades e esquecemento construída polos vencedores. Ese discurso inverteu os nomes, alcumando como "bandoleiros" aos rescaldos do exército fiel á legalidade.

Nun relatorio de Xurxo Ayán, no recente seminario sobre "Os movementos guerrilleiros" na Universidade de León, aprendín un dato que certifica a inxustiza cometida con guerrilleiras, guerrilleiros e enlaces: aínda hoxe non son recoñecidos como combatentes, quedando fóra eles e as súas familias das axudas –tardías, cativas– acordadas para o exército republicano desde 1984. Ayán levou a cabo, en Repil en 2016, a primeira escavación arqueolóxica da guerrilla realizada en España. Non sen enfrontar dificultades: alguén, polas noites, roubaba as ferramentas. Antonio, neto de Teresa, muller que colaboraba cos guerrilleiros e que despois de 1949, ao ser eles ametrallados, pasou tres anos no cárcere das Ventas, colocaba unha bandeira republicana, tamén roubada. As placas coa lembranza dos guerrilleiros asasinados na "batalla de Repil", soterrados como alimarias no atrio do cemiterio, foron destruídas.

Memoria é lembranza, crónica, e deber. "Memoria" era un dobre anel, do que un se desprendía, pendurando do dedo para non esquecer. Anel que nos lembra o deber de recoñecer e honrar a quen loitou pola liberdade.