Un Rías Baixas e un godello para abrir boca

Novas oportunidades para os albariños Rías Baixas produce a metade dos viños galegos, pero os máis comerciais diferéncianse pouco entre si e esa homologación non é satisfactoria. Ao mesmo tempo é unha das denominacións máis dinámicas hoxe. Convén darlles novas oportunidades a estes brancos frescos, de boa viticultura e cada vez máis desacomplexados que, en cantidades moderadas, xa non soben á cabeza. Temos no albariño unha gran variedade de uva galega, de orixe ancestral nas nosas costas e idónea para os nosos viños e a nosa gastronomía. Gozádeo con asesoramento e sen prexuízos. Mytilus 2017 / DO Rías Baixas / Adega Pombal A Lanzada / 9€ Un referente para non fallar Valdeorras é unha zona cálida, cunha maduración da uva que fai caer a acidez natural e eleva o alcol dos viños. Traballar con godello aquí para facer brancos non é doado. Son habituais os brancos golosos, pesados e quentes de máis. José Luís Aristegui é un bo viticultor que aproveita as condicións naturais para lograr viños de calidade. O seu coñecemento da zona e dos viños despois de anos de traballo lévao a anticipar as vendimas ao mes de agosto para perfilar mellor os seus viños. Tamén a usar o cangallo nas vinificacións para gañar en frescor. José Aristegui godello 2019 / DO Valdeorras / José Luís Aristegui / 13€