Orgullo da Ribeira Sacra

Branco heroico en terra de tintos Beber un viño é sentir unha paisaxe, coñecer un recuncho da terra. A zona é o elemento que máis marca o gusto dun viño, moito máis que a variedade de uva. Un bo xeito de experimentalo é probar un albariño da Ribeira Sacra e comparalo cun das Rías Baixas: nada que ver. Hai brancos na Ribeira Sacra e tintos en Rías Baixas. Hai tanta variedade nos viños galegos, que a mellor opción é deixarse levar e gozar sen mágoa da riqueza inmensa da nosa terra. Albariño da parcela O Condiño en terras altas de Castro Caldelas e do río Edo, afluente do Sil. Sorprende. Ponte da Boga Albariño 2020 / DO Ribeira Sacra / Ponte da Boga / 13€ Un tinto con ego colectivo Viticultores do Amandi son un grupo de mozos da zona que dá continuidade histórica ao traballo do pai dun dos integrantes, o taberneiro e viticultor Cuco de Amandi. O viño nace nunha boa zona histórica de viños dunha boa parcela con cepas vellas: A Larga. Unha tira de terra de viña en pendente superior ao 75% e socalcos con muros de pedra. Seleccionan a mellor mencía e, sen présa, fan un viño con cariño e con gañas de agradarnos, combinando tinos e barricas de distintas madeiras con cubas de inox. Apetece probar un novo orgullo da Ribeira Sacra? E.G.O. by Cuco 2017 / Ribeira Sacra fóra de D.O. / Viticultores do Amandi / 20€