Dos ERTE ao veto aos despedimentos: as medidas que prevé aplicar o Goberno español fronte á crise actual

A vicepresidenta segunda do Goberno español e ministra de Traballo, Yolanda Díaz, detallou esta segunda feira que o Executivo xa ten preparadas varias medidas para facer fronte ao impacto económico pola guerra en Oriente Próximo após a agresión militar dos Estados Unidos e Israel ao Irán, entre elas ERTE para traballadores e traballadoras e a prohibición de despedimentos, así como axudas a empresas e o mecanismo RED para permitir que se reduzan xornadas laborais.

"Temos unha panoplia de medidas que nin sequera hai que aprobar, xa están a disposición", afirmou Díaz en declaracións aos medios desde Bruxelas, destacando que o Goberno estatal xa aprobou este tipo de ferramentas en crises anteriores, e que nesta ocasión tiveron de novo o visto e prace dos axentes sociais. Segundo explicou, o Executivo trasladou a sindicatos e patronal un documento co conxunto de instrumentos dispoñíbeis, co obxectivo de "protexer o emprego e apoiar os sectores máis expostos ao encarecemento da enerxía e das materias primas".

"O que si quero é enviar unha mensaxe de tranquilidade e de serenidade ás empresas españolas e aos traballadores, porque estamos preparados para actuar se isto for preciso", afirmou a vicepresidenta, quen tamén sinalou que o Goberno español segue "con prudencia" a evolución da situación internacional, tras o aumento do prezo do petróleo e do gas rexistrado nos últimos días, e advertiu de que o principal impacto podería trasladarse ao custo da enerxía e á perda de poder adquisitivo.

Neste contexto, indicou que algúns sectores poderían verse especialmente afectados, como as industrias electrointensivas, e entre elas a química, o aceiro, a metalurxia ou a farmacéutica, debido ao seu elevado consumo de electricidade. Tamén apuntou a posíbeis efectos no sector agrícola polo encarecemento dos fertilizantes. "Imos tentar actuar no impacto que xera a perda de poder adquisitivo", sinalou a ministra, quen tamén mencionou sectores como o agroalimentario ou determinadas industrias exportadoras.

Críticas a Feixoo e a Von der Leyen

Durante a súa intervención, Díaz tamén cargou contra o Partido Popular e reclamou ao seu líder, Alberto Núñez Feixoo, que apoie as medidas se finalmente o Goberno decide activalas para facer fronte ao impacto económico da crise. "Gustaríanos que apoien esas medidas que imos defender", sinalou, tras reprochar aos 'populares' que en ocasións anteriores votasen en contra de medidas como a revalorización das pensións.

A vicepresidenta tamén respondeu ás declaracións da presidenta da Comisión Europea, Ursula von der Leyen, sobre o conflito en Oriente Medio, despois de que a dirixente comunitaria afirmase esta mesma segunda feira que nesta crise "o esencial non é se é unha guerra elixida ou necesaria" e sinalase que "non debe derramarse ningunha bágoa polo réxime iraniano".

Neste sentido, defendeu que a Unión Europea debe pronunciarse con claridade en defensa do Dereito internacional: "Esta guerra é ilegal, vulnera a Carta de Nacións Unidas e, por tanto, o que lle pido á presidenta da Comisión é que defenda a legalidade internacional". Así mesmo, advertiu de que Europa debe "dar un paso adiante hoxe" en defensa dos dereitos humanos e da "orde multilateral" para evitar que "aumente o escepticismo cara ao proxecto europeo e o apoio a forzas de extrema dereita".