A gran banca predí que a intelixencia artificial porá en risco dous terzos dos postos laborais

Ao redor de dous terzos das ocupacións existentes no mercado laboral actual da zona euro están expostas a algún grao de automatización a medida que avance a tecnoloxía en materia de intelixencia artificial (IA), segundo estiman dous investigadores do banco de investimento Goldman Sachs. O control e a seguridade da Intelixencia Artificial son as áreas "menos maduras" Esta tendencia afectaría sobre todo as profesións administrativas (46%) e legais (44%), mentres que nos oficios con traballos físicos intensos, como a construción e o mantemento, prevese unha exposición moito máis baixa, de 6 e 4% respectivamente. Os investigadores precisaron que tiveron en conta principalmente servizos de IA como ChatGPT, DALL-E e LaMDA. 300 millóns de empregos están en risco, segundo Goldman Sachs Trataríase dunha "perturbación significativa" para o mercado laboral, que exporía á automatización e aos despedimentos un equivalente a 300 millóns de traballadores e traballadoras a tempo completo nas economías máis desenvolvidas a nivel global, segundo os autores. O director de Información de Goldman Sachs, Marco Argenti, comparou o impacto do avance tecnolóxico no desenvolvemento dos chatbots (software baseado en IA capaz de imitar unha conversa en tempo real por texto ou voz) coa invención da imprenta. A tecnoloxía na que se basea, coñecida como modelo de linguaxe extensa (LLM), pode redefinir a "forma en que acumulamos, codificamos e distribuímos o coñecemento", afirmou o representante do banco. Na opinión de Argenti, estamos ante unha "revolución do coñecemento", porque, por primeira vez, a tecnoloxía permite "capacitar un LLM para interactuar con todo o que escribimos, todo o que dixemos e todo o que publicamos e acumular este coñecemento ao longo dos anos". Porén, Miguel González, tradutor, interprete e profesional da linguaxe computacional, en conversa con Nós Diario, advirte de que "os chatbots están configurados para imitar unha conversa mais non para dar respostas reais". En consecuencia, di, "a substitución do traballo humano polo das IA é algo que non me parece realista". "Hai xente interesada neste relato de que as IA chegaron a un punto no que poden suplir as persoas mais xeralmente detrás está o interese de que baixen as retribucións laborais, cando en realidade os resultados prácticos que dan as IA son en moitos casos extremadamente cuestionábeis", conclúe González. Traballos en risco? Un equipo investigador das universidades de Nova York, Pensilvania e Princeton, sinalou os empregos no sector das televendas e no da docencia en literatura, historia, dereito e idiomas como os máis ameazados pola expansión dos chatbots. Un espertar da intelixencia (artificial) Ao respecto, Miguel González sinala, desde a súa experiencia traballando con IA, que "as persoas que nos dedicamos a isto sabemos que as porcentaxes de erro son altas, en concreto, nós traballabamos cunha incerteza de 20%". Polo tanto, di, "unha taxa de acerto de 80% para empregar como unha ferramenta auxiliar está ben, mais empregala para algo importante como é a educación dunha persoa é absolutamente inaceptábel, non se pode depender de algo que erra unha de cada cinco veces". Novos empregos e riscos Outro estudo da Oficina de Estudos Económicos de Massachusetts atribuíu máis de 85% do crecemento do emprego nos últimos 80 anos ao desenvolvemento das tecnoloxías. Así, 60% dos traballadores e das traballadoras actuais, segundo esta análise, ocupan postos de traballo que non existían na década de 1940. Neste sentido, "novo traballo emerxe en resposta a innovacións tecnolóxicas", apuntou o equipo investigador. O uso da intelixencia artificial na Galiza, por baixo da media estatal Sobre esta cuestión, González explica que "hai moito traballo humano detrás das IA, e que o propio nome que se emprega é enganoso, xa que en realidade son sistemas de xestión da información que necesitan do enxeño das persoas para facerse, para funcionar e para manterse". "Unha IA non funciona por si mesma, hai miles de persoas traballando nela todos os días, esta é outra tendencia no capitalismo, a de intentar ocultar o traballo real humano", explica o lingüista computacional. "Cando se fala dunha IA e se intenta pór no marco que é superpoderosa e se ignora o emprego das ducias de miles de persoas que hai detrás dese programa estase intentando facer ver que se trata de algo máxico cando é un produto do traballo e que precisa del para seguir existindo", di. "Hai moitos empregos neste campo porque sen traballo estas cousas non poden funcionar", insiste. "Corrixir os mínimos erros nunha IA leva moito tempo", explica González. "Todo o que sabe unha IA é porque se lle programa e canto máis amplo sexa o que se pretende abarcar con ela máis sobe a cantidade de traballo humano necesario para que non cometa erros", conclúe. "As máquinas non se poden responsabilizar dos seus erros", advirte González Finalmente, o lingüista computacional advirte de que "se unha IA comete un erro, ninguén se dá conta, e acontece un accidente, a máquina non se pode responsabilizar, polo que hai que ter moito coidado co seu uso". Neste sentido, afirma o profesional, "estou seguro de que vai pasar algo así nos próximos anos". A lexislación da UE sobre os usos das IA segue pendente O Regulamento da Unión Europea (UE) en materia de Intelixencia Artificial (IA) segue pendente de ser aprobado. Ao respecto, a vicepresidenta primeira do Estado español e ministra de Asuntos Económicos, Nadia Calviño, asegurou esta cuarta feira que o Goberno estatal traballará para aprobalo durante a súa Presidencia do Consello da UE, que comezará en xullo. "Traballaremos co fin de sacalo adiante con éxito, deseñado a proba dos retos presentes e futuros", sinalou. A vicepresidenta volveu mostrar a súa oposición a unha moratoria nos avances en intelixencia artificial, e considerou que se trata dunha tecnoloxía "imparábel" cuxo impacto positivo se debe garantir desde o "deseño". Proxectos piloto Pola súa parte, Pedro Mier, presidente de Ametic, asociación que representa o sector da industria dixital do Estado, reflexionou sobre a conveniencia de permitir a empresas comunitarias participar no piloto estatal de intelixencia artificial e fixo un chamamento para que se reduza a burocracia nos fondos da UE. Ademais, o representante do sector dixital destacou a importancia de que o Regulamento da UE de Intelixencia artificial acerte na súa formulación para garantir a competitividade das empresas comunitarias.