Galiza é o terceiro territorio do Estado onde máis emprego se destruíu no último trimestre
Perdeu no cuarto trimestre de 2019 un total de 9.700 ocupadas e ocupados, segundo a Enquisa de Poboación Activa. Unha cifra só superada por Illes Balears e Estremadura. No conxunto do Estado español, no mesmo período, hai 92.600 ocupados máis. Ao longo do ano creáronse 7.900 empregos no noso país.
A Enquisa de Poboación Activa (EPA) correspondente ao cuarto trimestre de 2019 e que se publicou esta terza feira non deixa boas novas para Galiza. Somos o terceiro territorio de todo o Estado español onde máis descendeu o emprego a respecto do trimestre anterior: 9.700 postos de traballo destruídos, unha cifra só superada por Balears e Estremadura.
A taxa de variación trimestral de ocupación foi na Galiza de -0,88% mentres na media do Estado esa taxa aumentou en 0,47%. Se poñemos o foco na variación anual, vemos como aumentou a taxa de persoas con emprego en 0,73%. Unha boa nova que, porén, palidece se a situamos a carón do que aconteceu no Estado eses mesmos meses: o aumento foi de 2,06%. Case tres veces máis que na Galiza.
A EPA indica que en canto a poboación activa na Galiza hai 1.241.700. Son 4.700 persoas máis que hai un ano. Iso si, a respecto do trimestre anterior caeu en 7.400 persoas (-0,59%).
A taxa de paro foi no noso país no cuarto trimestre de 11,74%, por baixo da media estatal (13,78%).