Nova folga no sector bancario en demanda dun convenio "xusto": "A patronal propón un recorte de dereitos inasumíbel"
Persoal de entidades bancarias secunda nesta xornada unha folga na Galiza en demanda dun convenio "xusto" que inclúa melloras laborais, pero tamén salariais, despois dunha perda de poder adquisitivo que a representación sindical cifra en 15% nos últimos dez anos. Así o expuxo, en declaracións aos medios, Rosa Conde, responsábel de Banca na Federación de Banca e Servizos da CIG, sindicato que convocou a folga —tamén con convocatoria en Catalunya e Euskadi—, xunto cos sindicatos ELA, SEC-BBVA e Intersindical CSC.
Entre as súas principais reivindicacións está reclamar a recuperación do poder adquisitivo, a redución da carga de traballo e a recuperación do emprego, así como medidas contra o "acoso comercial brutal" que, sosteñen, sofre o persoal. "Queremos un convenio xusto", sentenciou a representante da CIG en relación á negociación co sector bancario. "En pandemia fixéronse innumerábeis prolongacións de xornada que non se viron recoñecidas e recompensadas", dixo, como exemplo da situación dos e das empregadas, ao que sumou os expedientes de regulación de emprego nos últimos anos.
Ademais, aludiu a uns "obxectivos desmesurados que se impoñen aos traballadores", en referencia á política comercial e á "sobrecarga de traballo" existente "con produtos que a propia normativa di que non se poden vender de maneira indiscriminada". Rosa Conde, que cifrou en case 7.000 os traballadores e traballadoras do sector na Galiza, estimou o seguimento da folga no país entre un 50 e un 60%. "É o momento das mobilizacións para negociar e que non traten de impor as súas condicións", aseverou, en alusión á negociación aberta desde hai meses.
A dirixente sindical insistiu en que na proposta da patronal hai "un recorte de dereitos inasumíbel". "Nun momento no que o sector se está recuperando de forma exponencial, non pode ser que os persoais non o vexan repercutido", engadiu. Por todo iso, considerou que unha suba de 8% para os catro anos non é suficiente ao "non cubrir o IPC que fechou en decembro, nin o de xaneiro".
Esta foi unha das consignas máis repetidas durante a manifestación convocada na Coruña e que, coa presenza de máis dun centenar de persoas, partiu da praza de Vigo até os Cantóns. 'Se sobe o IPC, os salarios tamén', 'recorte salarial á patronal', 'non é un convenio, é un atraco' ou 'o seu beneficio é o noso sacrificio' foron algunhas das proclamas escoitadas.