A folga do transporte por estrada deixouse sentir en toda a Galiza

A folga do sector do transporte por estrada decorreu esta sexta feira en toda a Galiza cun seguimento "masivo", "por riba de 90%" e "roldando o 100%" nalgúns casos, segundo sinalaron os tres sindicatos convocantes (CIG, CCOO e UXT). Convocada folga no transporte de viaxeiros por estrada o día 31 A reivindicación do persoal pasa por que a patronal negocie os convenios laborais, "paralizados", así como as táboas salariais, que, denuncian, non se actualizan desde hai dous anos no caso dos convenios da Coruña e Pontevedra e durante o último lustro no de Lugo e Ourense. Á marxe das "nefastas" condicións do persoal, as centrais sindicais critican o "lamentábel" estado das frotas de autobuses. Tamén culpan a Xunta, tanto a Consellaría de Infraestruturas e Mobilidade como a de Educación, por "permaneceren cegas e xordas" ante os problemas do sector e por "non responder ás múltiples denuncias realizadas". O persoal concentrouse nas estacións da Coruña, Vigo, Santiago de Compostela, Ferrol, Lugo, Ourense e Pontevedra para evidenciar o seu malestar. Sobre os motivos da convocatoria, o responsábel de Transporte na CIG, Xesús Pastoriza, explicou que son principalmente tres: "a paralización na negociación dos catro convenios provinciais, a situación precaria do sector (tanto no relativo ás condicións laborais como á propia prestación do servizo) e os reiterados problemas de seguridade que presentan os vehículos". Benigno Caride, de CCOO, non descartou un paro indefinido. Se non hai movementos por parte das empresas ou da Xunta, dixo, "terminará habendo folga indefinida" e subliñou que "hai motivos máis que suficientes" para a protesta, debido aos salarios "no limiar da pobreza", con xornadas "de 12 e 13 horas". Acabar con xornadas de 12 horas é unha das reivindicación do persoal Miguel Campos, de UXT, apuntou que "a administración responsábel aquí é a Xunta, que ten que mover ficha", despois de trasladar as desculpas polos "danos causados" ás persoas usuarias que no comezo da Semana Santa toparon coa folga. Desde a Federación Galega de Transportes (Fegatramer), pola súa parte, valoraron que a xornada "discorreu con normalidade", malia indicar o sector que "non permitiu dar cumprimento nin aos servizos mínimos", segundo Carlos García. O paro afectou o transporte interurbano, metropolitano, servizos escolares e proximidades, así como o urbano de Compostela e Lugo. Por outra parte, na cidade de Vigo, na que esta sexta feira comezaba a fin de semana 'grande' da Reconquista, coincidiu coa folga que mantén o persoal da concesionaria do bus urbano, Vitrasa. Testemuñas do persoal A condutora do transporte urbano de Compostela e delegada da CIG, Maica Dono, explica a Nós Diario que "a patronal ofrece 0,8% de suba salarial cando levamos dous anos sen convenio e máis de 12% de perda de poder adquisitivo". Alén diso, "as condicións de traballo cada vez son peores", sinala. "Monbús quedou con case todo o mercado e agora fai o que quere", engade. "Nunca viviramos unha situación con esta presión cando temos baixas acentuadas pola nosa situación tanto a nivel psicolóxico como físico", denuncia. "Hai xornadas de até 14 ou 15 horas e non se nos respectan as dietas nin os suplementos salariais, algo que se agrava nas novas contratacións e na xente que leva poucos anos", di. "As persoas que entran novas teñen un salario base de 1.047 euros, que é moi pouco, sobre todo tendo en conta a responsabilidade que temos", conclúe. O chofer de Monbús e delegado de persoal por CCOO José Jesús Brión, en conversa con Nós Diario, expón que a súa situación "indignificouse", algo que achaca, entre outros motivos, á duración das xornadas. "Converteuse en algo normal que traballemos durante 12 horas, e incluso hai días nos que podemos chegar até as 13, 14 ou 15 horas", denuncia. "O noso salario empobrécenos, xa que aínda se rexe polo convenio de 2018, polo que perdemos moito nivel adquisitivo", engade. "É de risa o que ofrecen", sentencia sobre a negociación do convenio. Ademais, di, "coas nosas xornadas a conciliación familiar faise moi complicada". O chofer apunta á responsabilidade que implica o seu traballo: "De nós depende a vida de moita xente, e iso non se ten en conta". Solidariedade das usuarias As mobilizacións estiveron tamén acompañadas pola solidariedade das persoas usuarias do transporte, como Teresa Vázquez, que participou dunha concentración en Ferrol. "Apoiamos a mobilización porque, ademais dunha suba de salarios, o que está demandando o persoal do sector son xornadas normais que non se excedan no número de horas e tamén un mellor estado dos autobuses, o que implica unha maior seguridade para as persoas usuarias", afirma en conversa con Nós Diario. Competencia A folga tivo lugar apenas unha semana despois de que se difundise que o Tribunal Superior de Xustiza da Galiza (TSXG) ordenou á Comisión Galega da Competencia iniciar os trámites dun expediente contra Monbús e Alsa "por indicios de que puideron repartirse o mercado", após a denuncia presentada pola CIG e Travieso Consultores de Xestión e Software de Transporte. A CIG espera que a sentenza do TSXG contra Monbus e Alsa “poña cordura” no sector do transporte Neste sentido, a Xustiza vén de admitir unha denuncia de Galibus contra Ignacio Maestro, director xeral de Mobilidade, ao que acusan de conivencia con Monbús nas licitacións, por permitir que esta empresa empregase os mesmos autobuses en diferentes concursos. O tren sofre unha xornada de atrasos coincidindo coa folga nos autobuses Múltiples atrasos e faltas de prazas sucedéronse esta sexta feira nos trens galegos Renfe presentábase esta sexta feira como a principal alternativa á folga nos autobuses, sobre todo para as persoas que percorren o Eixo Atlántico. Porén, a operadora non puido garantir o servizo desde primeira hora. Ducias de persoas quedaron en terra esta sexta feira pola mañá na estación de Vigo-Urzáiz por unha incidencia co tren de Media Distancia 9082, que debía partir da cidade olívica ás 8 horas mais foi suprimido, segundo trasladaron desde Renfe a Nós Diario, "por falta de maquinista". O caso deste tren foi só un dos exemplos dos múltiples atrasos que se sucederon durante toda a xornada ao longo do país. Renfe falla como alternativa na folga do transporte por estrada: atrasos e un tren cancelado por "falta de maquinista" A situación, que se suma á habitual falta de prazas dispoñíbeis en moitas frecuencias que se vén dando desde que se comezaron a expedir abonos gratuítos, non é nova para moitas viaxeiras: "Hoxe é probábel que chegue tarde a traballar grazas aos atrasos de Renfe. Quizais deberían aclarar cales son os motivos polos que non chega á hora nas últimas semanas. Os usuarios merecemos respecto", sinalaba unha usuaria a través das redes sociais. "A folga é de buses, non de trens", dicía outra. Unha cuestión, a do transporte por tren, á que se refería esta sexta feira o portavoz do BNG no Congreso español, Néstor Rego, que exixiu "apostar polo ferrocarril". Un medio “eficaz, eficiente e verde”, dixo, antes de engadir a necesaria "posta en valor de todas as infraestruturas existentes, a ampliación dos servizos con horarios, frecuencias e tarifas adecuadas e a implantación do servizo de proximidade". “Queremos corrixir o déficit histórico que sofre á Galiza en infraestruturas", defendeu Rego.