Despiden, sen pagar, persoal dunha auxiliar das Pontes
M3, con sede en Cartaxena, traballou nas obras de mellora da central térmica e agora deixou sen traballo a trinta persoas.
A situación nas Pontes é cada vez máis complicada para as empresas do entorno da central térmica. Trinta traballadoras e traballadores da empresa auxiliar M3 con sede en Cartaxena (Murcia) denunciaron a pasada quinta feira o seu despedimento sen cobrar, nalgún dos casos, máis de mes e medio de salario por traballos para outra compañía, Imasa, nas obras de mellora que Endesa está a realizar nas súas instalacións nas Pontes.
Vicente Vidal, responsábel de CIG-Industria na comarca de Ferrol, afirmou que "a situación dalgúns destas traballadoras e traballadores é desesperante". Apunta que algúns "non son de aquí" e mesmo houbo un caso que "tivo que recorrer a Cáritas para poder manterse".
O persoal desta empresa denunciou que algúns cobraron algunhas cantidades das súas nóminas após poñer en coñecemento de Imasa a situación que estaban a padecer. "Mais outros non percibiron ningún tipo de salario polos cincoenta días traballados, ademais do seu despedimento posterior", asegura Vidal.
O responsábel de CIG-Industria sinala que "alguén ten que facerse cargo desta situación, ben a propia M3, que foi quen contratou a este persoal, ou Imasa, e no último caso Endesa, que é para quen realizaron os traballos".
Suspendida a marcha desde As Pontes á Coruña
A marcha desde As Pontes até A Coruña que está a realizar o grupo de traballo creado no municipio para demandar unha transición xusta e a continuidade da central térmica de Endesa suspendeu por mal tempo a última etapa desta sexta feira que tiña que rematar na Coruña. A primeira etapa tivo lugar a pasado 10 de decembro desde As Pontes até A Capela. Ao día seguinte a marcha continuou desde A Capela até o municipio de Miño. Esta quinta feira percorreron a pé o tramo entre Miño e Bergondo.