CIG-Ensino exixe a demisión do conselleiro após a sentenza que anula o concurso de traslados

Máis de 1.600 ensinantes dirixíranse xa aos novos centros, adxudicados despois do concurso de traslados no que participaron por volta de 8.000 ensinantes. Son @s afectad@s de maneira directa da decisión da Consellaría de Educación de anular o concurso acatando a sentenza do Tribunal nº 2 de Compostela que invalida parcialmente a convocatoria. 

A mesma Consellaría que optara por aplicar unilateralmente o novo baremo polo que se computaban de igual maneira o tempo de interinidade que o de funcionariado de carreira, alegando maior seguridade, xurídica acata agora, sen a recorrer, a sentenza que bota por terra a decisión tomada ao convocar o concurso. O departamento da Xunta presidido por Xesús Vázquez continúa sen informar aos sindicatos da súa decisión e remite ao Portal Educativo para coñecer os pasos que a seguir darán para solventar a situación creada tras a anulación do concurso. En principio, todo apunta a unha nova rebaremación do profesorado mais hai serias dúbidas de que o proceso remate a tempo para que o 31 de xullo se publique a resolución dos destinos de ensinantes que aínda non teñen praza definitiva, segundo o calendario previsto. 

Desde a CIG-Ensino exixen a dimisión do Conselleiro de Educación, Xesús Vázquez pola “gravidade” dun proceso que, segundo din, “roza o esperpento e supón unha desconsideración total do profesorado”.  Critican o cambio de posicionamento da administración educativa a respecto do concurso que, se ben no momento de convocar explicaban en función dunha maior seguranza xurídica, remitindo á doutrina do tribunal da UE, agora nin sequera recorren á sentenza emitida polo Tribunal de Santiago. Con moitas posibilidades, a Consellaría optará por rebaremar e adaptar de novo os criterios que se empregan no concurso estatal, polo que a decisión que veñen de facer pública na súa web respondería a razóns políticas de acatar a liña seguida desde Madrid e non técnicas. 

Anxo Louzao critica o "esperpento" da xestión e o "escurantismo e prepotencia" da Consellaría 

Barco á deriva

“A única información que temos é a do portal da Consellaría e non dubidamos de que esta é unha decisión política, un novo desatino e unha tomadura de pelo ao profesorado que demostra unha vez máis a falta de seriedade da administración educativa que continúa dando pasos en falso”, critica, en declaracións a Sermos Galiza, Anxo Louzao, secretario xeral da CIG-Ensino. Denuncia o “escurantismo” do departamento dirixido por Xesús Vázquez que durante todo o día non responderon á petición de información por parte do sindicato. 

Custa entender, segundo Louzao, que despois da Consellaría ter defendido a conveniencia da súa actuación, acaten a primeira sentenza sen recorrer nin unha soa vez se non é por presións e decisión de orde política. 

“A Consellaría é un barco á deriva e o conselleiro é quen ten que levar o temón. A súa actuación é prepotente ao non ter en conta aos representantes dos traballadores  en cuestións que, como esta, lles está afectando directamente”, di Louzao para explicar a petición de demisión que defende a CIG. 

A falta de dirección que marque o rumbo da Consellaría está afectar tamén, segundo Anxo Louzao, ao caos que se está a producir a respecto da LOMCE. “Pretenden comezar a aplicala o curso que vén e nin sequera teñen publicados os currículos. Traballan á lixeira e sen rigor, con temeridade e irresponsabilidade”, sinala.