Bombeiros comarcais irán á folga para exixir máis persoal e melloras laborais

A asemblea xeral de bombeiros comarcais da Galiza decidiu esta segunda feira de forma unánime por parte dos máis de 200 participantes, "sen ningún voto en contra nin ningunha abstención", realizar unha convocatoria de folga indefinida ás portas do verán para defender a mellora das súas condicións laborais en todo o país. Os bombeiros comarcais de todo o país plántanse e irán á folga indefinida Deste modo, están convocados perto de 500 bombeiros dos ao redor de 25 parques comarcais existentes na Galiza que se dedican a labores como a extinción de incendios urbanos, a asistencia en accidentes ou o apoio en incendios forestais nos que existe risco para os inmóbeis. A asemblea, decorrida en Compostela, foi convocada pola mesa intersindical de bombeiros, que conforman a CIG, CCOO, UXT e o Sindicato Independente de Bombeiros (Sibgal), aínda que tamén contou coa presenza de representantes de CSIF e USO. O portavoz da mesa intersindical, Ángel Moldes (CIG), explicou que se convocará esta folga "debido á inoperancia dos diferentes consorcios para a conversión a persoal laboral fixo de todos os bombeiros da Galiza, segundo a doutrina do Supremo do ano pasado". "Cando saíu a doutrina do Supremo, os políticos dixéronnos que non se denunciase, que o ían a facer eles de motu proprio, e levamos un ano e tres meses esperando que o fagan", lamentou. O representante da CIG puxo de exemplo que esta semana se realizou un pleno na Deputación de Lugo para cumprir con esta cuestión, "mais a Xunta non se presentou e dixo que non quería saber nada". "Agora mesmo está todo parado", con mesas de negociación abertas en Lugo, A Coruña e Pontevedra. Os bombeiros do Salnés xa están en folga e o día 9 comezarán os de Lugo, mais os paros serán a nivel de toda Galiza unha vez sexan convocados no rexistro e decorra o prazo estabelecido pola normativa (uns 10 días). Moldes sinalou que cada parque comarcal ten o seu propio convenio, dándose a situación de que chegan a existir varios "con condicións ben diversas entre uns e outros". Para paliar esta problemática, os bombeiros demandan un convenio autonómico coas mesmas condicións para o persoal. O representante da mesa intersindical explicou que na Galiza hai perto de 500 bombeiros comarcais e que representan ao redor de 50% dos bombeiros de todo o país. Nas comarcas comprendidas na provincia de Pontevedra son 73, nas da Coruña perto de 190, nas de Lugo, ao redor de 120, e nas de Ourense máis de 100. O feito é que nos servizos de emerxencias, como ocorre no Salnés, os servizos mínimos que fixa a Administración son de 100%, mais "a Administración incumpre os seus propios servizos mínimos e tenta manter os parques cun mínimo de tres bombeiros". "Cando non son capaces fechan, como no caso de Vilagarcía, que leva fechado unha ducia de veces (desde marzo)", así como outros casos de parques que se clausuran os días nos que non hai un mínimo, como Cee, Santa Comba, Barreiros ou O Carballiño, entre outros. Os bombeiros reivindican que haxa un mínimo de catro ou cinco traballadores por parque. Unidade de acción En declaracións a Nós Diario, o portavoz da mesa intersindical, Ángel Moldes (CIG), afirma que "as Administracións dixeron que nos ían converter en persoal laboral fixo acatando a doutrina do Tribunal Supremo de febreiro de 2022 e solicitáronnos que agardásemos a que este cambio fora adoptado nos plenos". Convocada folga indefinida no Consorcio de Bombeiros de Lugo Porén, di, "levamos esperando ano e medio sen que o fixeran e temos mesas xerais abertas para esa conversión. Pola contra, propoñen convenios por debaixo das condicións que temos, polo que reivindicamos que cumpran a súa promesa de adoptar a fixeza laboral e que se negocie un convenio a nivel galego que dignifique o emprego de todos os bombeiros comarcais do país". "As Administracións -os consorcios contan coa participación da Xunta e das Deputacións- quedaron en facer a aprobación en pleno en lugar de que nós xudicializaramos o cumprimento da sentenza do Supremo. Tiveron ano e medio para facelo mentres nós seguimos agardando", láiase o sindicalista. "Queremos negociar un convenio galego que iguale as condicións de todos os bombeiros comarcais", afirma Moldes. "A Lei de Emerxencias non se está cumprindo pois o Estatuto do Bombeiro tiña que estar aprobado xa desde 2008, polo que estamos todos a unha para que se unifiquen as condicións", explica o portavoz dos bombeiros. "Solicitamos a atención urxente das Administracións e que se senten a negociar con nós antes de que o seguimento da folga indefinida implique consecuencias prexudiciais para a cidadanía", conclúe o representante da CIG. Tamén en conversa con Nós Diario, os representantes sindicais de UXT, Álvaro Negreira, e de Sibgal, Honorino Raña, coinciden en que as principais demandas do colectivo atinxen a reclamación da conversión dos bombeiros comarcais en persoal laboral fixo e no estabelecemento dun novo convenio a nivel galego que mellore as condicións laborais en todos os consorcios. Así mesmo, tamén destacaron a unidade de acción do persoal. O persoal de extinción pide un convenio a nivel galego O director xeral de Emerxencias, Santiago Villanueva, afirmou en maio do ano pasado que, en canto estivesen os catro consorcios en xestión directa, unha situación que xa se dá, que a idea era "presentar unha negociación de convenio único á Xunta da Galiza na que se discutirían unhas condicións para igualar os postos de traballo de cada un dos bombeiros, independentemente de en que consorcio traballen". Bombeiros e policías tiveron que exercer de médicos cun paciente que finalmente faleceu tras demorarse a ambulancia en Ponteareas Porén, a promesa feita por Villanueva non se cumpriu, aínda que os bombeiros comarcais lembran que a reivindicación "non é só contra a Xunta", xa que os consorcios están xestionados polo Goberno galego e as deputacións. "Tomaremos as medidas que teñamos que tomar en función de que Administración nos poña paus nas rodas", avisan. Condicións claras para desconvocar os paros A desconvocatoria da folga pasaría pola execución da sentenza do Supremo para a conversión a persoal laboral fixo e pola negociación dun convenio a nivel galego coas catro Deputacións e a Xunta da Galiza, sinala a mesa intersindical. Así mesmo, a mesa espera que as Administracións "chamen a negociar", porque "se non, este verán vai ser complicado sen bombeiros para botar unha man nos incendios forestais".