Radiografía do desemprego na Galiza: seis de cada dez paradas son mulleres e medra a contratación temporal

O mes de febreiro rematou na Galiza con 130.583 persoas desempregadas, son 518 menos que o mes anterior (-0,40%), segundo informou esta segunda feira o Ministerio de Traballo e Economía Social. Na comparativa con febreiro de 2023, o desemprego rebaixouse nun total de 13.509 persoas no país, 9,38% menos. Porén, en relación á afiliación á Seguridade Social, con datos do Ministerio de Emprego e Seguridade Social, os contratos que máis medran con respecto ao mes de xaneiro son os temporais, que pasaron de ser 26.731 a 27.231 (2,9%), seguidos dos indefinidos fixos-descontinuos, de 30.778 a 31.166 (1,3%) e os indefinidos a tempo parcial, de 113.489 a 114.455 (0,9%). En canto a sexos, do total de persoas desempregadas, 54.955 foron homes e 75.628, mulleres. Ademais, hai 5.289 persoas desempregadas menores de 25 anos (+85), repartidas entre 2.706 homes e 2.583 mulleres. Por último, as persoas sen emprego anterior son 11.487. O paro rexistrado aumentou en xaneiro na Galiza en 51 persoas cada día Por sectores, na Galiza as cifras varían. Os servizos contan cun total de 93.300 desempregados (381 menos); seguidos de construción, con 8.759 parados (148 menos); industria, con 12.785 (124 menos); e agricultura, con 4.252 parados (69 menos). O desemprego feminino Estas cifras amosan que 60% das persoas rexistradas como paradas son mulleres. Para o secretario confederal de Emprego da CIG, Francisco González Sío, este dato "constátase mes a mes" e apunta que, "aínda que hai unha certa recuperación do emprego no que ten que ver coa contratación indefinida, iso non afecta da mesma maneira ás mulleres". O mesmo acontece, segundo destaca Sío, "cando falamos da duración da contratación, por ser os homes maioritariamente os que teñen contratos a tempo completo mentres que as compañeiras están a tempo parcial". En opinión da secretaria de Emprego de CCOO, Maica Bouza, “nun mes con datos positivos non se xustifica que as mulleres galegas sigan soportando unha inxusta fenda de xénero”, polo que indica que hai que loitar “contra a discriminación laboral das traballadoras en calquera das súas formas e negociando propostas no diálogo social, na negociación colectiva e nos plans de igualdade para mellorar as súa condicións de vida”. Desemprego xuvenil: reto pendente Aumento do emprego temporal Na análise dos datos coñecidos esta segunda feira, González Sío entende que “estamos creando un modelo económico baseado na estacionalidade do traballo e na contratación precaria”, algo que confirmarían as cifras de afiliación á Seguridade Social en canto a contratación. Ante o aumento dos indefinidos a tempo completo, este sindicalista salienta que os que máis aumentan son os temporais a tempo parcial, o que o leva a concluír que “xa non hai temporais a tempo completo, agora xa se fan todos os contratos temporais a tempo parcial”. Respecto do aumento dos fixos descontinuos, considera que “é imparábel”, ao igual que no caso dos indefinidos a tempo parcial, que amosan unha tendencia que mes a mes confirma o seu constante incremento. Pola contra, desde a UXT, o seu secretario de organización, José Luís Fernández Celis, pensa que os datos “mostran un mercado laboral forte na Galiza”, un panorama que cre que é consecuencia “da Reforma Laboral de 2021 que segue a crear emprego de calidade”. Para este sindicato, os "postos de traballo estábeis, asentados cada vez máis sobre o contrato indefinido" teñen que ver "cunha maior capacidade de resistencia ante contextos adversos". O sector servizos fai baixar o paro mentres medra o desemprego na industria, a construción e o agro Desde CCOO, a súa secretaria de emprego, Maica Bouza, salienta que, un mes máis, "continúan os bos datos no ámbito laboral". Porén, considera que "aínda hai moita marxe de mellora", xa que "a contratación indefinida no Estado español é moi superior á rexistrada na Galiza: 46 % fronte ao 37 % galego". Neste sentido, Maica Bouza critica o "menor compromiso do sector empresarial galego co traballo de calidade". Paro na mocidade e de longa duración Francisco González Sío, en relación á perda de empregos na mocidade, critica a Xunta da Galiza e as súas políticas cualificándoa de “cuadrilla de demolición”. Entende que “cada vez hai menos persoas novas, xa non polo problema demográfico, que é enorme na Galiza, senón tamén polas políticas económicas e industriais do goberno do Partido Popular á fronte da Xunta, que son nefastas para Galiza e para o seu futuro”. CCOO, pola súa parte, tamén lamenta "que a mocidade siga padecendo os peores datos do mercado laboral, con maiores taxas de desemprego e de precariedade". Por último, a UXT, introduce a cuestión do desemprego estrutural que afecta 41.800 persoas, un aspecto "que hai que mellorar e evidencia a ineficacia das actuais políticas de emprego", destaca Fernández Celis. O paro volve subir na Galiza, que rexistra máis de 130.000 persoas no desemprego 82% das desempregadas sénior sentiu discriminación Un informe elaborado pola Fundación Adecco indica que un 23% das mulleres en activo na Galiza supera os 55 anos, cando hai 10 anos a porcentaxe era de 15,5%. No estudo indican que un 82% das desempregadas sénior actuais sentiu "discriminación" no seu acceso ao mercado laboral. Neste sentido, un 77,4% sinala que esta situación produciuse na entrevista de traballo, onde se cuestionou a súa capacidade para manexar novas tecnoloxías, a posíbel sobre cualificación ou maiores esixencias salariais, así como a disposición para traballar para persoas mozas. Ademais, indican que un 70% das mulleres maiores de 50 anos en desemprego renunciou (ou aparcou), nalgunha ocasión, a súa carreira profesional para coidar a súa familia. Por outra parte, destacan as paradas de longa duración. Un 59% das mulleres sénior en desemprego leva máis dun ano buscando emprego, fronte a 40,7% do resto das mulleres. "Ante esta realidade, non sorprende que 95% das mulleres enquisadas atope algún grao de dificultade para chegar a fin de mes. En concreto, un 48,2% termina o mes con moitas dificultades, un 31% faio con dificultade e un 16,5% con certa dificultade", conclúen no estudo.