A Xunta recoñecía na fin de semana unha “posíbel transmisión comunitaria” na Mariña
Un auto dun xulgado de Lugo recolle un informe de Sanidade da pasada fin de semana no que se apontaba ao “fracaso” das medidas para conter o brote.
“Non se pode desbotar unha posíbel transmisión comunitaria [da Covid-19 na Mariña] de baixa intensidade allea ao brote debido aos casos que aínda non se poden relacionar con el”, “as medidas actuais dispostas para controlar a transmisión [do virus] fracasaron ou non foron abondo para impedir que a infección se difundise...”.
Son frases textuais do informe da Subdirección Xeral de Información sobre Saúde e Epidemioloxía do 4 de xullo pasado, sábado, e que indicarían que as mensaxes públicas que transmitían desde o Goberno galego eran moi diferentes das que manexaban internamente no Sergas.
Este informe é citado nun auto do xulgado do contencioso-administrativo n º2 de Lugo, ao que esta segunda feira (6 de xullo) a Consellaría de Sanidade se dirixiu para que dese ratificación xudicial á decisión adoptada de fechar e confinar A Mariña a partir das 00:00 horas da segunda.
O Xulgado dá esa conformidade, mais no argumentario para ratificar esa decisión de Sanidade é cando fai referencia (no punto terceiro) ao informe da mencionada Subdirección Xeral.
Un informe no que, segundo recolle a resolución xudicial, fálase nesa altura dun cento de persoas infectadas, así como da “posíbel transmisión comunitaria” e do “fracaso” naquela das medidas adoptadas pola Xunta para combater o brote, de aí que ratifique a decisión de confinar a comarca.
Nos comunicados do Sergas desta cuarta feira sobre o brote da Mariña, o Servizo Galego de Saúde indica que "todos estes positivos están relacionados co brote", o que, engaden, "permite garantir a trazabilidade dos casos e seguir na mesma estratexia de procura activa de contactos e realización de todas as probas necesarias de forma precoz para cortar canto antes a transmisión".