A XLIII Feira do Viño abriu as súas portas con 13 adegas

Un total de 13 adegas da subzona de Chantada, dentro da Denominación de Orixe Ribeira Sacra, abriron esta sexta feira as súas portas ao público inaugurando unha nova edición da feira do viño. Este evento é un dos máis concorridos e dos que máis botellas vende de todas cantas teñen lugar no país.

A degustación de viños marcará o programa de actividades e o decorrer da fin de semana. Até 50 elaboracións distintas estarán a disposición das persoas visitantes, tanto no recinto feiral como no Túnel do Viño de Chantada, un espazo aberto tamén a todos os públicos malia estar deseñado para un consumo máis repousado, curioso ou mesmo profesional.

Roberto Vilar será o encargado de pronunciar o pregón da XLIII Feira do Viño de Chantada. Será o domingo 8 de marzo ás 13 horas, pouco despois de que teña lugar a lectura do manifesto do 8M. 

Ademais, o 7 e 8 de marzo, quen se achegue á Feira do Viño de Chantada tamén poderá gozar da XVII Feira de Oportunidades e da XVI Mostra de Produtos e Artesanía.