Voluntariado desenvolverá labores de restauración hidrolóxica e ecolóxica en zonas queimadas en Valdeorras
A Asociación para a Defensa Ecolóxica da Galiza, Adega, presentou esta quinta feira no Barco de Valdeorras o programa do Campo de Voluntariado Ambiental que a entidade desenvolverá desde esta tarde e até o domingo na comarca; en concreto, en zonas queimadas polos incendios forestais que afectaron a zona este verán. Durante dous días desenvolverá labores de restauración hidrolóxica e ecolóxica das terras arrasadas polo lume, con especial atención á preservación das traídas e captacións de auga destinada á poboación.
Voluntariado ambiental
A actividade está organizada por Adega e conta coa colaboración dos concellos da Rúa, Petín, O Barco, Vilamartín e O Bolo; tras rexeitaren a Xunta e a Confederación Hidrográfica Miño-Sil o ofrecemento da entidade ecoloxista. "A Xunta xa non nos escoitou e o proxecto que lle presentamos á Confederación, para seis meses, tampouco foi adiante, así que chegamos a un acordo de colaboración con estes cinco concellos para unha primeira intervención, a máis urxente, co voluntariado de Adega" e que chegou a contar cunha base de máis de 700 persoas, precisou a Nós Diario Froilán Pallín, secretario xeral da organización.
Con esta iniciativa, sinalou, pretenden reclamar a atención da Xunta, das confederacións hidrográficas e das deputacións, para que "asuman as súas competencias e responsabilidades e colaboren de forma coordinada na resolución dos gravísimos problemas sociais, económicos e ambientais que os incendios forestais deixaron tras de si".
Pallín reivindicou un voluntariado en defensa do monte galego xestionado de forma conxunta e coordinada polas diferentes administracións, un voluntariado que actúe durante "todo o ano contra os lumes forestais" realizando traballos de seguimento, vixilancia, prevención e concienciación.
Segundo lembrou, Adega foi pioneira na organización e xestión de voluntariado galego en defensa dos montes após a vaga de incendios de 2006. Agora pon a disposición das poboacións afectadas aquela experiencia e todos os recursos humanos e técnicos ao seu alcance.
En colaboración con persoal dos concellos e especialistas en materia de restauración medioambiental, identificou as zonas a onde acudirá o voluntariado en grupos de até 15 persoas, zonas próximas a cursos de auga, de difícil acceso e con importantes pendentes, que son as de maior risco de erosión e perda de solo.
Adega pon o material de traballo, a loxística máis a coordinación técnica mentres os concellos colaboran co aloxamento e a manutención dos equipos que actuarán nos montes queimados dos que dependen as captacións das Arcas, que dan auga a Petín e A Rúa; na contorna do rego de Fontei, na Rúa; nas ladeiras do río Leira en Vilamartín, totalmente arrasadas, e na Lomba de Peniguillón, ao carón da captación de augas da Forcadela do Barco de Valdeorras. Ademais tratarán de frear a erosión das ladeiras do Diluvio, no val do río Xares, en Pena Trevinca (A Veiga). Máis adiante, Adega espera chegar até o teixadal de Casaio, en Carballeda, onde aínda non se desenvolveu ningunha acción.