Vigo lembra o 78 aniversario dos bombardeos de Hiroshima e Nagasaki
Vigo acolleu esta cuarta feira un acto de lembranza do 78 aniversario do lanzamento das bombas nucleares por parte dos Estados Unidos de América (EUA) nas cidades xaponesas de Hiroshima e Nagasaki, o 6 e o 9 de agosto de 1945, respectivamente.
En palabras do voceiro da entidade organizadora, o Comité Anti OTAN de Vigo, Manuel Garrido, foi un acto "universal" e "de memoria para recordar o feito humano máis desagradábel da historia da humanidade", que foi o bombardeo de poboación civil nipona cando "todas as investigacións sinalan que naquela altura a guerra estaba xa practicamente rematada".
Garrido sinala tamén a Nós Diario a importancia de recordar este suceso no marco da situación xeopolítica actual: "En Ucraína está a decorrer unha guerra e a escalada nuclear pode acontecer en calquera momento. Temos que ter memoria".
Nun acto presentado por Mónica Bernárdez e que contou coa música de Santiago Veloso, na praza da Princesa escoitáronse poemas de Antonio Teijeiro, Anxo Angueira, Isolda Alcázar e Fran Alonso. Interviron tamén no evento –ao que asistiron representantes políticos como o voceiro do BNG en Vigo, Xabier P. Igrexas– o relator Xosé Vieira e Manolo Garrido. Ao remate, Anxo Barreiro soltou unha pomba, símbolo da paz, mentres soaba o violín de Laura Quintillán.