A Universidade das Nacións Unidas recoñece un proxecto de combate contra as especies invasoras no monte galego
‘Vemo-nos no Monte!’ foi un proxecto transfronteirizo entre a Galiza e Portugal.
A Universidade das Nacións Unidas recoñeceu o proxecto ‘Vemo-nos no Monte! Educación para a Prevención, Control e Educación sobre Especies Invasoras’, como “buque insignia” (flagship) dos proxectos educativos innovadores da Global RCE Network de educación para o desenvolvemento sustentábel.
‘Vemo-nos no Monte!’ foi un proxecto transfronteirizo realizado durante 18 meses, entre os anos 2022 e 2023, levado a cabo pola Fundación Montescola, a Fundación CEER (Centro de Estudos Euro rexionais Galicia-Norte de Portugal) e a asociación portuguesa À Escuta, co apoio das Brigadas Deseucaliptizadoras de Verdegaia.
A Universidade de Nacións Unidas (UNU) é unha universidade estabelecida o 6 de decembro de 1973 ao implementar a resolución 3081 da Asemblea Xeral das Nacións Unidas. A UNU é un organismo autónomo das Nacións Unidas, cuxa Carta establece a súa plena independencia universitaria. Traballa en estreita colaboración coa Secretaría da ONU, a Unesco e outras organizacións do sistema de Nacións Unidas, e polo seu intermedio fortalécense os vínculos coa comunidade universitaria internacional. Leva a cabo o seu labor a través dunha rede de centros e programas de investigación e de formación, tanto nos países desenvolvidos como nos países en vías de desenvolvemento.
A motivación de "Vemo-nos non Monte!" é a necesidade de xuntar esforzos entre varias asociacións ecoloxistas que, desde hai varios anos, veñen traballando na problemática ambiental na Galiza e o Norte de Portugal.
Co obxectivo de coidar os espazos naturais máis vulnerábeis fronte ao problema común da expansión de especies exóticas invasoras (EEI), organizáronse brigadas de voluntarios para cortar acacias e eucaliptos.
No transcurso destas accións, identificáronse varias demandas, tales como: ia necesidade de formar as persoas (que forman parte da comunidade) no coñecemento das especies exóticas invasoras.
Persoas (que forman parte de movementos comunitarios e sociais) que se están activando e agrupando ao redor de conflitos ambientais locais/rexionais e transnacionais, coa ambición de promover tamén a mestizaxe xeracional e a necesidade de colaborar entre entidades dos territorios veciños de Galiza e Norte de Portugal para o intercambio de coñecementos e boas prácticas.