Todo o país, agás a costa, en aviso amarelo por chuvias
Nalgunhas comarcas do oeste e do centro, Meteogalicia advirte de acumulacións de máis de 15 litros por metro cadrado en tan só unha hora para este domingo.
Toda Galiza, agás as faixas costeiras, está este domingo, 20 de setembro, en aviso meteorolóxico por abundantes precipitacións, que poderían deixar até máis de 40 litros por metro cadrado en 12 horas.
Segundo a información de Meteogalicia, permanecen en alerta amarela desde a medianoite todas as comarcas do interior do país. As chuvias máis abundantes agárdanse nos concellos da metade norte e do sueste, e ademais pódense dar episodios "localmente fortes" de precipitacións no centro, sur e nas montañas orientais, ademais de na zona noroeste afastada do mar.
Nestas últimas comarcas, ademais de nas do suroeste galego e nas comarcas da Terra Chá, Lugo e noutras limítrofes, o aviso amarelo advirte de acumulacións de máis de 15 litros por metro cadrado nunha hora.