"Tiña unha úlcera nun pé do tamaño dun puño"

Carmen Barreiro ingresou no centro de maiores de DomusVi de Monforte de Lemos o 16 de xullo de 2020. Segundo relata a Nós Diario a súa neta, Iria Álvarez, “a miña avoa entrou na residencia andando, polo seu propio pé, e sen limitacións. Vinme obrigada a ingresala porque presentaba un problema ansioso-depresivo que me impedía prestarlle os coidados que requiría e non por outras razóns médicas, dado que se atopaba en bo estado de saúde sen prexuízo dos problemas derivados da idade”. Malia isto, a súa situación non tardou en empeorar e as persoas responsábeis da residencia de DomusVi de Monforte de Lemos informaron a Iria Álvarez das caídas da súa avoa. “As caídas nos centros de maiores son consecuencia da falla de persoal para prestar atención ao persoal residente”, explican a Nós Diario traballadoras e traballadores das residencias, que lembran que “o incumprimento das ratios por parte dos operadores da dependencia levan a que un só auxiliar se vexa obrigado a levantar o usuario e adoitan producirse os accidentes”. Neste sentido, as asociacións de familiares de usuarios e usuarias teñen criticado en repetidas ocasións o Goberno galego por non investigar as caídas e observan na falla de dilixencia para actuar fronte ás mesmas “unha mostra de conivencia da Administración coa patronal dos centros de maiores”. A saúde de Carmen deteriorouse nos dous meses que viviu no centro de maiores de DomusVi. Iria Álvarez lembra como atopou a súa avoa unha vez trasladada da residencia ao hospital de Monforte: “Nun estado físico lamentábel, tras perder 10 quilos en dous meses e inconsciencia. No hospital comunícannos que miña avoa tivo un trombo pulmonar, que levaba unha semana na residencia medio durmida e que tiña o intestino cheo de feces”. “Tras informarme dunha pequena úlcera, pido que lle destapen o pé para vela e atopo unha úlcera do tamaño dun puño e con moi mal prognóstico. No mesmo momento confírmanme que presenta outra úlcera na zona do sacro, desnutrición severa e infección de ouriños”, conclúe Iria Álvarez. As consideracións de neta de Carmen son confirmadas polo seu propio médico de Atención Primaria. Nun informe asinado polo facultativo o 21 de outubro de 2020 e ao que tivo acceso Nós Diario afirma que a anciá “actualmente presenta úlceras de cúbito en talóns e desnutrición, presenta un gran deterioro cognitivo sen filiar. A doente non presentaba ningunha da sintomatoloxía, arriba descrita, antes de entrar na residencia de anciáns”. Neste sentido, traballadoras de DomusVi confirman a Nós Diario que as úlceras entre as persoas usuarias son habituais e resulta moi complicado tratalas correctamente, debido á falla de persoal. A negativa a hospitalizar a Carmen Barreiro A úlcera no pé e na zona do sacro así como o grave estado de saúde de Carmen non foi razón suficiente para que a dirección de DomusVi a derivase ao hospital de maneira inmediata. A este respecto, Iria Álvarez destaca que “cando vin a miña avoa por videochamada e a notei moi mal, solicitei o 1 de outubro á directora da residencia de Monforte que a derivase ao hospital pero a única resposta que recibín foi que non, que non podía derivala sen causa concreta e que probabelmente sufrise un pequeno ictus ou sinxelamente ‘un baixón da idade polo confinamento’”. Porén, un día despois, o 2 de outubro unha sanitaria do centro decidiu solicitar o ingreso de Carmen no hospital de Monforte. O estado da usuaria da residencia presentaba complicacións importantes no momento da súa hospitalización. Derivada do centro médico de Monforte ao complexo sanitario do Meixoeiro de Vigo, foi dada de alta o 22 de outubro. O parte clínico afirma que no seu ingreso no hospital detectóuselle fecaloma e síndrome de Ogilvi e que se confirma “presenza de TEP bilateral [tromboembolismo pulmonar], ICC [insuficiencia cardíaca] secundaria, e úlcera necrótica grado IV en talón esquerdo con datos de sobreinfección, así mesmo compróbase a desnutrición proteica”. As consecuencias da estadía no centro de maiores de DomusVi de Monforte deixaron a Carmen secuelas até hoxe. Nun informe elaborado polos facultativos do hospital Montecelo de Vigo en decembro de 2020 ponse de manifesto que Carmen “é completamente dependente para coidados básicos na vida diaria” e que “precisará coidados de úlceras de cúbito no seu centro” e mais coidados permanentes de enfermaría.